Këshilli i Ministrave ka miratuar kontratën e qirasë me tarifë simbolike 1 euro për kalimin e një reparti ushtarak me hapësirë rreth 12 mijë e 690 metra katrorë tek shoqëria “Partizani” sh.a. Sipas vendimit, bëhet fjalë për pasurinë shtetërore nr.3/442, e identifikuar si “Reparti ushtarak nr.6010 (IGJIU), ish-RU nr.7030 (IGJU)”, e ndodhur në zonën kadastrale 8110 në Tiranë. Prona mbetet formalisht në pronësi shtetërore dhe nën përgjegjësinë e Ministrisë së Mbrojtjes, por i jepet me qira shoqërisë “Partizani” sh.a.

Klubi i Partizanit prej vitit 2016 nisi punimet në këtë zonë dhe stadiumi "Arena e Demave" është tanimë në përdorim të klubit të kuq. Ngërçi i vetëm për marrjen e gjithë pronës në dispozicion tanimë ka kaluar dhe KF Partizani mund të vijojë me prishjen e dy godinave të amortizuara dhe ndërtimin në to të dy fushave, një pishine dhe ambienteve të tjera ndihmëse për akademinë.

Veç stadiumit, Partizani ka ngritur edhe një hotel që do i shërbejë klubit për grumbullimet e futbollistëve. Plani fillestar ka qenë që dy fushat ndihmëse të jenë me bar artificial dhe stadiumi me bar natyral, por impianti "Arena e Demave" u pajis me bar artificial për shkak të nevojës për stadium.

Tanimë me marrjen e gjithë pronës në dorëzim, pritet që projekti të zhvillohet i plotë dhe KF Partizani të ketë në dispozicion gjithë infrastrukturën.

Dy godinat e ish-repartit ushtarak që ngadalësuan punimet

Njoftimi i Qeverisë:

V E N D I M
PËR

NJË SHTESË DHE NJË NDRYSHIM NË VENDIMIN NR.183, DATË 9.3.2016, TË KËSHILLIT TË MINISTRAVE, “PËR DHËNIEN E MIRATIMIT PËR LIDHJEN E KONTRATËS SË QIRASË ME TARIFËN 1 EURO/KONTRATA, NDËRMJET MINISTRISË SË ZHVILLIMIT EKONOMIK, TURIZMIT, TREGTISË DHE SIPËRMARRJES, SI QIRADHËNËS, DHE SHOQËRISË “PARTIZANI”, SH.A., SI QIRAMARRËS, PËR PASURINË “AMBIENTE TË PRONËS NR.4, ME EMËRTIM “REPARTI USHTARAK NR.4030, RRUGA “MYSLYM KETA”, TIRANË”, NË ADMINISTRIM TË MINISTRISË SË MBROJTJES”

Në mbështetje të nenit 100 të Kushtetutës, të nenit 5, të aktit normativ nr.4, datë 9.7.2008, të Këshillit të Ministrave, “Për privatizimin dhe dhënien në përdorim shoqërive tregtare dhe institucioneve shtetërore të ndërmarrjeve apo objekteve të veçanta, mjeteve kryesore dhe mjeteve të xhiros së këtyre ndërmarrjeve”, miratuar me ligjin nr.9967, datë 24.7.2008, të ndryshuar, dhe të krerëve I, pika 5, shkronja “e”, dhe V, të vendimit nr.54, datë 5.2.2014, të Këshillit të Ministrave, “Për përcaktimin e kritereve, të procedurës e të mënyrës së dhënies me qira, enfiteozë apo kontrata të tjera të pasurisë shtetërore”, të ndryshuar, me propozimin e ministrit të Ekonomisë dhe Inovacionit, Këshilli i Ministrave

V E N D O S I:

Në vendimin nr.183, datë 9.3.2016, të Këshillit të Ministrave, bëhen shtesa dhe ndryshimi, si më poshtë vijon:

1. Pas pikës 1 shtohet pika 1/1, me këtë përmbajtje:

“1.1. Dhënien e miratimit për lidhjen e shtesës së kontratës së qirasë, me tarifën 1 euro/kontrata, ndërmjet Ministrisë së Ekonomisë dhe Inovacionit, si qiradhënës, dhe shoqërisë “Partizani”, sh.a., me NUIS K02322003T, si qiramarrës, për pasurinë e paluajtshme shtetërore nr.3/442 (prona nr.6, me emërtim “Reparti ushtarak nr.6010 (IGJIU), ish-RU nr.7030 (IGJU)”), me sipërfaqe të përgjithshme 12 692.94 (dymbëdhjetë mijë e gjashtëqind e nëntëdhjetë e dy pikë nëntëdhjetë e katër) m2, në zonën kadastrale 8110, me vendndodhje në Tiranë, në përgjegjësi administrimi të Ministrisë së Mbrojtjes, sipas dokumentacionit të pronësisë, genplanit dhe tekstit të projektkontratës, që i bashkëlidhen këtij vendimi.”.

2. Në pikën 2, emërtesa “Ministria e Zhvillimit Ekonomik, Turizmit, Tregtisë dhe Sipërmarrjes” zëvendësohet me “Ministria e Ekonomisë dhe Inovacionit”.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

Vendimi i Qeverisë