Von der Leyen: Ditët e ardhshme vendimtare për BE dhe Britaninë e Madhe

Nuk është ende e sigurt nëse do të ketë marrëveshje post-brexit mes Mbretërisë së Bashkuar dhe Bashkimit Evropian, por ditët e fundit ka pasur një progres të ndjeshëm në bisedime, është shprehur kështu Presidentja e Komisionit Evropian, Ursula von der Leyen.

“Ashtu siç qëndrojnë gjërat tani, nuk mund të them nëse do të ketë marrëveshje ose jo. Por, mund të them se tani ka një rrugë drejt marrëveshjes. Rruga është shumë e ngushtë, por ekziston”, tha Von der Leyen.

Presidentja ka theksuar se ende ka pengesa mes palëve, në veçanti të drejtat e peshkimit.

“Kemi gjetur një rrugë përpara në shumicën e çështjeve, por dy prej tyre mbeten ende pengesë: fusha e barabartë e veprimit dhe peshkimi. Ditët e ardhshme do të jenë vendimtare”, tha ajo në Parlamentin Evropian.

Britania dhe BE-ja janë në ditët e fundit të negociatave për të mbrojtur tregtinë e lirë, në vlerë prej 1 trilion dollarësh, pas 31 dhjetorit, kur Britanisë i përfundon periudha e tranzicionit, pas daljes nga BE-ja.

Dështimi për të arritur marrëveshje para 31 dhjetorit, mund të krijojë kaos në kufij, për shkak të tarifave dhe masave të tjera dhe një skenar i tillë  do t’i lëkundte gjithashtu tregjet financiare dhe zinxhirët e furnizimit në të gjithë Evropën.

TAG:
• BE
• brexit
• Mbreteria e Bashkuar