Kundërshtitë e PD për Amnistinë Penale, Kthupi: Këto janë 2 pikat që duam të ndryshohen në projektligj

 

Sekretari për Çështjet Zgjedhore në PD, Rezart Kthupi i ftuar në emisionin ‘Repolitix’ foli për mosdakordësitë e PD-së së Bashës sa i takon Amnistisë Penale që pritet të votohet nesër në Kuvend.

Kthupi tha se PD nuk është dakord që të ketë ulje dënimi edhe për personat e gjykuar nga GJKKO si dhe për çështjen e protestuesve, pasi Basha ngulmon që të ketë amnisti për protestuesit e opozitës nga 2018 deri në 2020.

“Për të arritur në një draft të dakordësuar duhet të dakordësohet në komision Të rishikohet në komision drafti. Marrëveshje jo publike nuk mund të bëhen. Sa i takon uljes së vuajtjes së dënimit me 1 vit për burrat dhe një vit e gjysmë për gratë, nuk duhet ta përfitojnë personat që janë gjykuar nga GJKKO. Kjo është taksative. Pika 3 e nenit 6 për protestuesit të rikthehet në pikën si ishte”- nënvizoi Kthupi.

Ndërsa deputeti Plarent Ndreca iu përgjigj duke thënë se në projektligjin për amnistinë janë përfshirë edhe protestuesit e opozitës por me ndryshimin që nuk do të ketë afat kohor për protestat ku kanë marrë pjesë dhe se ata të cilët kanë kryer vepra të tjera penale si shkatërrimi i pronës apo kundërshtimi i policisë, të mos përfshihen.

Lajmi kryesor:

Amnistia Penale/ Ndreca rrëzon pretendimin e Bashës: S'përfitojnë zyrtarët e korruptuar as të hetuarit e SPAK! 2 ndryshimet që kërkon PD

B.V/KT/Shqiptarja.com

TAG:
• lulzim basha
• rezart kthupi
• repolitix
• Rithemelimi
• PS
• amnisti penale
• Plarent Ndreca
• ULSI MANJA