Eurodeputetja qipriote, Eleni Theocharous, e ka konsideruar vrasjen e ushtarit grek Konstantino Kacifas nga forcat RENA në Bularat të Gjirokastrës si çështje të shkeljes së të drejtave e kësisoj, ajo ka bërë të ditur se do t'i drejtohet Parlamentit Evropian.

“Kam detyrim moral te hap çështjen e shkeljes së të drejtave dhe vrasjes së Kacifas në Parlamentin Evropian”, ka thënë ajo për mediat greke,duke shtuar se “Kacifas mund të arrestohej, por policia shqiptare vendosi ta ekzekutonte.”

Theocharous i është kundërpërgjigjur deklaratave të kryeministrit Edi Rama, duke i thënë këtij të fundit që komentet përkundrejt ushtarit grek t’i mbajë për vete. “Le të jetë kryeministri i korrupsionit që e konsideron “ekstremist të marrë” e jo Athina”, është shprehur eurodeputetja greke duke iu referuar ushtarit.

Më herët, eurodeputetja greke, e cila cilësohet si një raportuese nën hije, ka thënë se Shqipëria “nuk do të hyjë me gjak” në Bashkimin Europian.