Zgjedhjet e pjesshme vendore, Celibashi: Votimi elektronik në Vorë, 100% i sigurt, rezultati menjëherë pas votimit! Për bashkitë e tjera, brenda 48 orëve

Katër ditë para zhvillimit të zgjedhjeve të pjesshme vendore, KQZ ka testuar sot pajisjet e identifikimit elektronik, ku votuesit do kenë mundësi të votojnë përmes identifikimit biometrik.

Në Bashkinë e Vorës edhe votimi do të jetë elektronik, teksa kreu i KQZ-së, Ilirjan Celibashi theksoi me bindje se ky sistem është 100% i sigurt.

Ai theksoi se për Bashkinë  e Vorës rezultati, të paktën ai paraprak, do të bëhet me dije menjëherë pas zgjedhjeve. Për pesë bashkitë e tjera, Celibashi u shpreh se rezultati do të dalë brenda 48 orëve.

"Nëse ka një gjë për të cilën përgjigjem me siguri absolute është siguria e votës përmes sistemit elektronik në Vorë. Jo vetëm KQZ nuk ka mundësi të identifikojë kush ka votuar e për kë, as prodhuesi i pajisjes nuk e ka një mundësi të tillë. Në dallim nga zgjedhjet e 25 prillit, rezultuan paraprak ta shpallim menjëherë pas zgjedhjeve. Për bashkitë e tjera afati është 48 orë për rezultatin e zgjedhjeve, por po punojmë që procesi të finalizohet sa më shpejt të jetë e mundur", tha Celibashi për mediat.

Zgjedhjet e pjesshme vendore do të zhvillohen në Vorë, Rrogozhinë, Lushnjë, Shkodër, Dibër dhe Durrës. KQZ-ja ka njoftuar 654,538 shtetas shqiptarë kanë të drejtë të marrin pjesë në votimet e pjesshme të 6 marsit. Janë 10,134 zgjedhës qe votojnë për herë të parë, ndërsa 135 shtetas nuk janë përfshirë në lista për shkak të dekriminalizimit. 941 është numri i qendrave të votimit.

Kandidatët e PD
Bashkia Shkodër, Xhemal Bushati,
Bashkia Durrës: Luan Hoti
Bashkia Lushnjë: Indrit Sefa, 
Bashkia Dibër: Luan Haka
Bashkia Rrogozhinë: Ferdinand Saraçi
Bashkia Vorë: Ymer Marku. 

Kandidatët e PS
Për Bashkinë Durrës, PS garon me Emirjana Sakon, aktualisht kryetare në detyrë.
Për Bashkinë Shkodër,  PS garon me Majlinda Angonin, aktualisht prefekte e qarkut Shkodër.
Për Bashkinë Dibër, PS garon me Rrahim Spahiun, me karrierë të gjatë në administratën publike dhe atë bankare.
Për Bashkinë Rrogozhinë, PS garon me Edison Memolla, aktualisht kryetar i komanduar.
Për Bashkinë Vorë, PS garon me Blerim Shera, arsimtar.
Për Bashkinë e Lushnjës Eriselda Sefa

Kandidatët e Grupit të Rithemelimit (Sali Berisha+LSI)
Bashkia Shkodër: Bardh Spahia
Bashkia Durrës: Ardian Muka
Bashkia Lushnjë: Eton Bano
Bashkia Dibër: Premtim Kryemadhi
Bashkia Rrogozhinë: Hekuran Xhani
Bashkia Vorë: Lulzim Vrana

 

/r.k./Shqiptarja.com

TAG:
• kqz
• ilirjan celibashi
• zgjedhjet 6 mars 2022