Ja cilët janë një pjesë e emrave të koalicionit të majtë, që do të garojnë në votimet e 21 qershorit.
Në Durrës Vangjush Dako, që synon të marrë mandatin e tretë në krye të bashkisë së qytetit bregdetar.
Në Elbasan Qazim Sejdini, gjithashtu do të garojë për një mandat të tretë si kryebashkiak.
Në Fier gara është mes 2 emrave potencial, deputetit socialist Armando Subashi dhe ish-drejtorit të ujësjellësit Salarjon Tota.
Më e lehtë gara paraqitet në Korçë, ku Sotiraq Filo, do të garojë për mandatin e tij të parë të plotë, pasi aktualisht u zgjodh si zëvendësues pas largimit të Niko Peleshit si zëvendëskryeministër.
Në Lezhë emri i kryetarit aktual të Bashkisë Viktor Tushaj, pritet të jetë përsëri në garë, për një mandat të tretë në krye të bashkisë.
Shkodra pritet të ketë kandidaten e të majtës Keti Bazhdari, e cila ka kryesuar departamentin e të përndjekurve politik në Partinë Socialiste.
Për Beratin në garë janë 2 emra që vijnë nga LSI, i pari është deputeti aktual Gledion Rahovica dhe Petrit Sinaj që aktualisht mban postin e kryetarit të LSI në Berat.
Në Gjirokastër do të garojë prefektja e qarkut Zamira Rami, LSI synon përsëri bashkinë e qytetit jugor pas humbjes që pësoi në votimet e 2011.
Prefektja e Vlorës Etjona Hoxha pritet të jetë kandidatja e të majtës për këtë bashki, pas 3 mandateve të Shpëtim Gjikës, që ka deklaruar se nuk do të jetë më pjesë e garës.
Në qarkun verior të Kukësit pritet të garojë kryetari aktual i bashkisë Hasan Halili, nën siglën e LSI. Halili është zgjedhur kryetar nën siglën e Partisë Demokratike në 2011, por ju bashkua LSI pas zgjedhjeve të 2013-ës.
Në Bashkinë e Peshkopisë, janë dy emra: Shukri Xhelili dhe Muharrem Rama.
Tirana mbetet ende enigma më e madhe për këto zgjedhje, që pritet të zyrtarizohet në ditët në vijim. E ndërsa në media qarkullojnë emrat e disa ministrave, kryeministri Edi Rama në takimin me kryetarin e LSI Ilir Meta, nuk përjashtoi mundësinë, që një grua të garojë për metropolin e vendit. Por pavarësisht emrave që qarkullojnë në media, ajo që Rama dhe Meta kanë deklaruar pas takimit të së dielës, ishte fakti se brenda 1 prillit do jetë lista e plotë e garuesve. Rama-Meta mesa duket emrat pritet t’i zyrtarizojnë pikërisht në 1 prill, duke e vlerësuar si data fatsjellëse, pasi edhe koalicioni i parë u zyrtarizua në 1 prill 2013.
Kandidatët për bashkitë nga koalicioni i majtë
Durrës – Vangjush Dako
Fier – Armando Subashi dhe Salarjon Totaj
Korcë – Sotiraq Filo
Lezhë – Viktor Tushaj
Shkodër – Keti Bazhdari
Berat – Gledion Rahovica dhe Petrit Sinaj
Gjirokastër – Zamira Rami
Vlorë – Etjona Hoxha
Kukës – Hasan Halili
Peshkopi – Shukri Xhelili dhe Muharrem Rama
Tirana – Ende pa kandidat zyrtar
Përmet - Bledi Mane
Bashkitë e tjera nga koalicioni i majtë
Kavajë- Elvis Rroshi
Përrenjas – Miranda Rira
Tepelenë- Tërmet Peci
Lushnje- Fatos Tushe
Pogradec – Roshi Tollozhina
Shijak- Indrit Buka
Librazhd – Kastriot Gurra, Enver Shkurti
Skrapar – Nesim Spahiu
Gramsh –Dritan Bici
Redaksia Online
(Gre.M/Shqiptarja.com)