Zjarri masiv që përfshiu pallatin 12 katësh të "Arlis", pranë QSUT-së të martën, dyshohet të jetë shkaktuar nga pakujdesia e disa të miturve. Burime pranë grupit hetimor bëjnë me dije se pasi janë administruar pamjet e kamerave të sigurisë të bizneseve përreth, që hedhin dritë mbi ngjarjen.

Në video shfaqen pesë të mitur që qëndrojnë për disa minuta në pjesën e pasme të një marketi, aty ky nisën flakët në fillim. Pak më vonë dy prej tyre largohen duke mbajtur në duar një objekt të paqartë, që dyshohet të ketë qenë një copë letër.

Të miturit e hedhin atë mbi disa kuti kartoni të vendosura jashtë marketit dhe largohen menjëherë nga vendngjarja. Vetëm pak minuta më vonë, në të njëjtin vend shfaqet tym, i cili në një kohë shumë të shkurtër shndërrohet në flakë, duke u përhapur me shpejtësi në fasadën e pallatit dhe duke shkaktuar dëme të konsiderueshme materiale.

Për këtë ngjarje nën hetim është vënë pronari i kompleksit ‘Arlis’ Armando Lilo si dhe 2 punonjëse të marketit. Sakaq, është arrestuar menaxherja e marketit, administratori i pallatit, inxhinieri drejtues i punimeve dhe administratori i subjektit që ka bërë punimet për fasadën e kompleksit.

TË ARRESTUAR
Enver Ademi - inxhinieri i kompanisë Arlis
Altin Furtuna - Kontraktori që ka bërë fasadën
R.S- menaxhere e marketit
Agron Cara -  Administratori i pallatit
NËN HETIM 
2 punonjëse të marketit
Sh. B., 41 vjeç, i kontraktuari për ndërtimin e  kompleksit

Lajmi në përditësim...

-------------------------------

Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë