Për 50 vite me rradhë, në një varrezë publike në Bruksel, u prehën eshtrat e dy shqiptarëve, luftëtarë të lirisë, të cilët i kushtuan çështjes atdhetare jetën e tyre, duke sakrifikuar familjen dhe vendlindjen , e duke përqafuar një kauz të vështirë si ajo e antikomunizmit në mërgim. Gjon Bala (Progni), së bashku me djalin e vëllait të tij Marashin, dy emigrantë politik, antikomunistë, të arratisur nga regjimi i Enver Hoxhës në gusht të vitit 1948, nuk mundën ta shohin më për së gjalli as familjet e tyre as atdheun. Në letrat e tyre dhe në porositë e fundit kishin lënë amanet se nëse vdisnin larg atdheut, një ditë, familjarët ti merrnin eshtrat e tyre e ti kthenin në vendlindje. Ishte ky një amanet që do të rëndonte tek familjarët në Shqipëri për afro gjysëm shekulli, derisa një ditë prilli të vitit 2023, ky amanet do të çohej në vend.