Shpëtim Sharra ka jetuar një jetë të vështirë e plot sakrifica, vuajtje dhe persekutim, përgjatë gjithë dekadave të diktaturës. Por pesha më e rëndë e jetës së tij duket se ka qenë mungesa e babait, dhe historia e tmerrshme e ekzekutimit të tij nga regjimi, kur ai ishte vetëm 7 vjeç. Kur ishte në atë moshë dhe për dy tri vitet në vijim, në ndërgjegjen e tij si fëmijë do të nguleshin një varg ngjarjesh të tmerrshme. Prej të rriturve do të mësonte copëza historish rreth ekzekutimeve të 6 burrave më të zotë të familjes së tyre. I pari kishte qenë xhaxhai i tij Aziz Sharra, ekzekutuar nga komunistët në fund të Luftës së Dytë Botërore. E menjëherë pas instalimit të regjimit komunist do të nisnin arrestimet, torturat dhe vrasjet e njëpasnjëshme, të burrave të familjes Sharra. Nji prej tyre ishte edhe babai i Shpëtimit, Muharremi. Muço Sharra, gjyshi i Shpëtimti, do të humbte kështu edhe djalin e vetëm që i kishte mbetur.