22 viktima me COVID-19/ 16 raste të reja brenda 24 orëve (377 në total) ! 30% e të infektuarve janë shëruar! (VIDEO)

Një pacient 90-vjeçar ka humbur jetën në spitalin infektiv, si pasojë e tromboembolisë pulmonare, njofton Ministria e Shëndetësisë.

90-vjeçari ishte i prekur edhe nga COVID19 dhe vuante nga disa sëmundje bashkëshoqëruese (tromboemboli pulmonare, diabet mellitus, hipertension). Pacienti ndodhej i shtruar prej 5 ditësh në spitalin infektiv në gjendje të rëndë shëndetësore.

Sipas mjekëve që e kanë trajtuar gjatë gjithë kësaj kohe, shkaku i vdekjes së 90-vjeçarit është tronboembolia pulmonare.

Mes 12 personave që kanë mundur koronavirusin, 3 janë personel mjekësor duke çuar kështu në 21 numrin e bluzave të bardha që janë shëruar. Kështu bën të ditur ministrja e Shëndetësisë, Ogerta Manastirliu.

"Edhe 3 personel shëndetësor janë shëruar pas testit konfirmues nga laboratori i virologjisë në IShP. Shkon në 21 numri i mjekëve dhe infermierëve të shëruarve nga COVID19. Deri tani 116 qytetarë dhe staf mjekësor e kanë mundur COVID-19", shkruan Manastirliu.

Një mësuese ka dalë pozitiv me COVID-19, duke çuar numrin e të prekurve në 26 numrin e të infektuarve në Fier. Ajo jetonte në të njëjtin pallat me çiftin e të moshuarve që u konfirmuan me koronavirus disa ditë më parë. Mësuesja e prekur jeton në shtëpi me prindërit e saj të cilët janë vetëizoluar pas përgjigjes së analizave. Për pasojë, pallati ku jeton mësuesja është dezinfektuar. Një gjë e tillë është bërë edhe pas konfirmimit se janë prekur me koronavirus çifti i të moshuarve.

Tre rastet të konfirmuara me COVID-19 janë 3 punonjës të Policisë Kufitare, të cilët janë infektuar më herët nga kolegu i tyre. Të tre punonjësit janë të vetëizoluar së bashkë me familjen e tyre. "Pacienti zero" në Has është një e moshuar e cila kishte pasur histori udhëtimi në një nga zonat e kuqe dhe pas kthimit në vendlindje mori pjesë në një ceremoni mortore, ku fatkeqësisht infektoi vëllanë e saj të ndjerë dhe motrën. Pak ditë më parë u shfaq një vatër e re me 7 të infektuar të një familjeje që nuk kishin lidhje me rastin e parë dhe së fundmi 3 punonjësit e policisë kufitare të Hasit. Në total, Hasi numëron 12 të infektuar e COVID-19, mes të cilëve njëri ka humbur jetë.

Rreth 40 është numri i bluzave të bardha të infektuar me COVID-19! Një shifër e tillë është konfirmuar nga zv. ministrja e Shëndetësisë Mira Rakacolli, teksa theksoi se gjysma e tyre është shëruar.

Rasti i ri i konfirmuar me COVID-19 në Poliçan është një 75-vjeçar nga Pronoviku. Nuk dihet ende historiku i infektimit të 75-vjeçarit, teksa mësohet se i është bërë tamponi dhe ka rezultuar negativ.  

Koronavirusi është përhapur me shpejtësi në Shkodër, dhe ky qytet është bërë shembull se si mos respektimi i masave të marra ka çuar në një bilanc të rënduar.

Burime për Report Tv bëjnë me dije se ka shkuar në 48 numri  i personave të prekur në Shkodër. Janë konfirmuar pozitiv një tjetër anëtar i familjes në Dobraç, dy të tjerë të familjes në Kiras, të cilët u infektuan e para në një ceremoni mortore dhe e dyta gjatë vizitave në shtëpi për një të sëmurë. Gjithashtu, janë konfirmuar pozitiv dhe 2 anëtarë të një 80-vjeçareje që ishte infektuar më herët si dhe infermieri që i shërbente asaj.

Në total brenda 24 orëve, janë regjistruar 6 raste të reja.