20 Shkurt 1991, dita e rrëzimit të
bustit të Enver Hoxhës, si ndodhi

TIRANE- Pas krijimit të PD dhe themelimit të sindikatës së pavarur, iu bë thirrje popullit të Tiranës t’i bashkangjitej më 20 shkurt grevës së urisë së studentëve. Në mëngjes u ngrit gjithë populli i Tiranës në Qytetin Studenti. Gjithçka ishte spontane. Skenari i vetëm ishte qëndrimi pranë studentëve. Në njërën nga godinat e studentëve në kat të katërt u instalua një qendër zëri qe erdhi nga kombinati i Autotraktorëve prej sindikalistëve dhe aty fliste gjithkush, pa doganë.

Ndërkohë që më pas njerëzit vërshonin si një lumë i tërbuar e të gjithë drejtoheshin nga qyteti Studenti drejt rrugës së Elbasanit. Te godina e RTVSH-së dolën disa makina që nuk ishni parë ndonjëherë, ndërsa zjarrfikëset kishin ujë me ngjyrë, ndoshta për të dalluar më pas. U hodh dhe gaz lotsjellës. Turma po lëvizje në bulevardin kryesor të kryeqytetit, ndërkohë u përhap thashathemnaja se ishte bërë grusht shteti e se Ramiz Alia nuk ishte gjallë.

Kjo solli irritimin e turmës që ishte bllokuar në afërsi të Lanës dhe që po drejtohej në drejtim të Bllokut, piëkërisht aty ku dëgjoheshin krisma. Ka qënë ndërhyrja e fortë e njërit ndër liderët e dhjetorit, Neritan Ceka që turma të zmbrapsej, pasi dha lajmin se asgjë nuk kishte ndodhur. Kështu situata u qetësua dhe turma u drejtua për nga sheshi. Ajo doli në bulevard dhe kaloi te busti i Skënderbeut, ku ishin dhe makinat e blinduara. Në krah të Bankës së Shqipërisë u tentua disa herë për të çarë kordonin e policisë.

Në një moment, rreth 30 vetë arritën të hipim në piedestalin e shtatores së Enver Hoxhës e i vendosën litarin bustit të diktatorit në qafë. Më pas kushedi nga doli një makinë që e tërhoqi bustin derisa u rrëzua dhe më pas e tërhoqi zvarrë nëpër shesh simbolin e komunizmit dhe duke shënuar në këtë mënyrë dhe rrëzimin real të diktaturës komuniste. Ndërsa policia dhe forca e sigurisë vetëm sa e kanë soditur këtë ngjarje pa përdorur asnjë shenjë dhune në shesh, madje dhe fishekët ishin manovre.

Shkrimi u publikua sot (15.02.2014) në gazetën Shqiptarja.com (print)

Redaksia Online
(d.d/shqiptarja.com)

TAG:
• neritan ceka