Qytetarët në zonat e gjelbërta shijojnë lirinë: Të dalin njerëzit nga depresioni! I moshuari nuk 'ngopet' me diellin...në dyqane shfaqen blerësit e parë

Edhe pse bashkia e Pogradecit është konsideruar si një nga zonat e gjelbra në Shqipëri me masa lehtësuese për qytetarët, masat strikte përsa i përket parqeve bënë që edhe sot Parku i Drilonit të gëzojë qetësinë absolute, ndërsa në heshtje dëgjoheshin fëshfërimat e gjetheve të pemëve dhe cicërimat e zogjve.

Kjo hapësirë është më e frekuentuara në juglindje, por masat ndaj COVID-19, kthyen këtë park, në ëndrrën e gjithsecilit që e sheh nga larg. A thua për sa kohë ky park i cili qëndron në vëmendjen e gjithsecilit të qëndrojë i paprekur?

Deri atëherë, kjo panoramë qe fal shumë do mbetet vetëm e shpendëve nën shoqërinë e tingujve të natyrës!\

Në qytetin e Fierit duket sikur COVID-19 nuk ka ekzistuar kurrë. Qytetarët kanë mbushur rrugët, bizneset e pakicës janë hapur për të pritur blerësit e mundshëm, pas më shumë se një muaji e gjysmë mbyllur. Në rrugë janë parë të rinj, fëmijët e të moshuar.

Në Fier janë konfirmuar 37 raste me koronavirus, nga atë cilat 27 janë shëruar. Mesa duket kjo shifër optimiste, i ka bërë qytetarët që të dynden rrugëve.

Kryetari i Bashkisë së Gjirokastrës, Flamur Golemi, e shpallur zonë e gjelbër,  në një intervistë për Report Tv, ka deklaruar se qytetarëve nuk i kanë zbatuar masat e marra, e për pasojë ka paralajmëruar se nëse kjo situatë do vijojë, do të kërkojë ndërhyrjen e qeverisë. Në një intervistë për gazetarin e Report Tv, Piro Nase, Golemi tha se nga vëzhgimi që është bërë, ka rezultuar që ka pasur qytetarë që kanë dalë më shumë se 2 persona në rrugë, që është në shkelje të rregullave.

"Vazhdojmë të jemi në një situatë emergjente, duket të ruajmë masa, t'i shfrytëzojnë liritë, mos të abuzojnë. Përgjegjshmëria e qytetarëve duhet të jetë maksimum, është kjo qytetari që ka bërë që në Gjirokastër. Por qe kjo situatë si kjo ku njerëzit kanë dalë dyshe-treshe, do i kërkojmë qeverisë që të marrë masa. Kemi thënë se s'duhet të ketë njerëz që lëvizin më shumë se 2 persona, ky është problemi i vetëm që kemi hasur. Shpresoj që kjo gjë të ndryshojë", tha Golemi.

Koronavirusi nuk i ka ndalë qytetarët që të marrin rreze dielli dhe të bëjnë plazh, edhe pse kjo është e ndaluar. Qytetarët kanë shfrytëzuar temperaturat e larta për të bërë plazh, pavarësisht urdhrit të drejtorit të përgjithshëm të Policisë së Shtetit, Ardi Veliu nuk do të tolerohen. Siç shihet në foto e Report TV, aty kanë mbërritur uniformat blu që i kanë shpërndarë në shtëpi.

Mjeku në Pogradec u ka bërë thirrje qytetarëve që të respektojnë masat, pasi në një vëzhgim që ka bërë shprehet se nuk i kanë respektuar masat. Sipas tij, kjo vjen për shkak se "u ka dalë frika", duke iu bërë apel që t;i vlerësojnë liritë që kanë.

"E ka vlerësuar ashtu siç duhet dhe bëri që të jemi një shtet me pak vdekshmëri, liritë duhet t'i vlerësojnë edhe njerëzit, se s'do i rrinë nga pas. Unë jam mjek dhe e di. Pogradeci gjithmonë është një popull që  i zbaton frika, u ka dalë frika. por duke qenë kështu nuk i respektojnë masat, dalin sot dyshe-treshe, por do binden. U bëj thirrje që duhet ta vlerësojnë këtë pandemi botërore, për të shpëtuar dhe veten e tyre dhe familjarët. Është virus që do kujdes", tha mjeku. 

Tregtari në Pogradec shprehet se me mbylljen e biznesit të tij ka pasur shumë dëme, pasi i ka mbetur stok malli i dimrit. Ai është shumë pak optimist për të ardhmen, por shprehet se "ia lë në dorë Zotit"

"Sot e kemi hapur për herë të parë, gjendja duket shumë e qetë, nuk ka asnjë rast, po punë nuk ka. Asnjë blerës nuk më ka ardhur deri më tani. Bllokimi i malli të dimrit, lëvizja e kufizuar, do ta kem shumë të vështirë. Vështirë se do shes diçka. Tani me Zotin, të shohim çdo ndodh", tha tregtari.

Pas më shumë se një muaji e gjysmë i mbyllur, dyqanet e pakicës kanë nisur aktivitetin e tyre. Për Report Tv, një tregtare që shet qelqurina është shprehur optimiste, duke thënë se i kanë ardhur blerësit e parë. Sipas saj, kanë qenë të ndërgjegjësuar, pasi kanë zbatuar protokollin e sigurisë.

"Që më datën 11 mars e kemi mbyllur, sot është dita e parë me bismilah, sapo hapëm dyqanin filluan shitjet. Kam marrë leje, plus me maska, doreza, distanca. Klienti i parë që më ka hyrë ishte shumë i rregullt, ka ndërgjegjësim nga ana e klientëve. Dëme ekonomike ka se ne jemi dyqan me qira, të mos llogarisim fitim vetjak. Sot një lëvizje e paparë", tha tregtarja.

Pas një muaji e gjysmë i mbyllur në shtëpi, i moshuari nuk "ngopet" me diellin. Ai duhet të ishte në shtëpi, sipas rregullave të reja që janë vënë në zbatim në zonat e gjelbërta, ku bën pjesë edhe Pogradeci, por i moshuari për Report Tv shprehet se do qëndrojë edhe një gjysmë ore dhe do rikthehet në shtëpi.

"Do qëndroj dhe nja gjysmë orë. Ka dal rinia dhe pleqëria. Po i respektojmë, por ngaqë kemi ndenjur shumë në shtëpi, 2 muaj e pak, duket sikur na jep jetë", tha i moshuari.

Saranda është një nga ato qytete, që nga sot i është rikthyer jetës normale, gati 50 ditë që prej fillimit të pandemisë në vendin tonë. Nga videot duket qartë se lëvizja e qytetarëve në rrugë, por edhe e automjeteve ngjan si një ditë e zakonshme.

Edhe taksitë janë rikthyer në vendqëndrimin e tyre të caktuar, ndërsa çdo biznes ka ngritur qepenat.

Sakaq shëtitorja buzë detit sot duket fiks si në një ditë pranvere, me qytetarët të cilën e kanë populluar dhe sërë prej tyresh lëviznin me bluzë me mëngë të shkurtra. Gjithsesi ajo që bën përshtypje është se disa qytetarë lëvizin pa asnjë masë mbrojtëse, qoftë edhe maskë.

E vetmja gjë që mungon për hapjen e plotë të Sarandës është rifillimi i shkollave, që me siguri vendimi do të merret në rang vendi.

Gjirokastra është një nga zonat e gjelbërta, ku nga kjo e hënë kanë nisur zbatimin masat e reja lehtësuese. Edhe pse një zonë kufitare, në këtë qytet nuk është regjistruar asnjë rast dhe sot pas më shumë se një muaji e gjysmë, qytetarët e  po shijojnë "lirinë".

"Shumë mirë, bravo i qoftë neve jemi të mrekullueshëm"

"Vendim shumë i mirë, pa sëmundje jemi, pa probleme, i vëjmë lavdi Zotit që të iki sa më shpejt ky virusi"

"Po, jam i kënaqur, të jemi mirë, mos ta kemi këtë sëmundje"

"Masat duken shumë mira, kam dalë dhe herë të tjera për nevoja familjare"

"Gjirokastra s'ka gjë. E ka menduar shumë mirë, të punojnë njerëzit, të lëvizë ekonomia, të dalin njerëzit nga depresioni", shprehen për Report Tv disa nga qytetarët.