Hungaria dhe Sllovakia janë rreshtuar në anën e Vladimir Putinit dhe kanë bllokuar sanksionet e reja europiane kundër Rusisë. Por tensioni më i mprehtë regjistrohet për kredinë prej 90 miliardë eurosh në favor të Ukrainës, të miratuar nga Këshilli Europian në dhjetorin e kaluar, për të cilën tani Budapesti ka ndryshuar qëndrim, duke vënë në rrezik fondet për mbijetesën e Kievit, i cili ka likuiditet deri në fund të marsit, shkruan La Repubblica.

"Është vërtet për të ardhur keq që vendimi i marrë nga të gjithë liderët e Këshillit Europian", ka akuzuar shefja për Politikën e Jashtme, Kaja Kallas, në përfundim të mbledhjes së ministrave të Jashtëm të BE-së, tani përbën një hap pas." "Presim”, shtoi një zëdhënëse e presidencës së Komisionit, “që të gjithë liderët të respektojnë angazhimet e tyre; mosrespektimi do të ishte shkelje e parimit të bashkëpunimit të ndershëm."

Por si zakonisht Viktor Orbán e ngre nivelin e përplasjes për të negociuar më pas. Në këtë moment ai ka interes ta shtojë polemikën me Brukselin sepse pas më pak se dy muajsh në Hungari do të mbahen zgjedhjet. Në mënyrë edhe më prozaike, kryeministri hungarez në fund do të japë miratimin në këmbim të diçkaje. Elementi i parë konsiston në riaktivizimin e naftësjellësit Druzhba, që transporton naftë nga Rusia në Hungari. Por presidentja e Komisionit, Ursula von der Leyen dhe presidenti i Këshillit Europian, Antonio Costa, të cilët sot do të bisedojnë me Orbán nga Kievi me rastin e ceremonive për përvjetorin e katërt të fillimit të luftës, mund të vendosin në tryezë zhbllokimin e fondeve Safe për Budapestin, që arrijnë në 17,4 miliardë euro.

Sigurisht, ngërçi mbi sanksionet dhe bllokimi i kredisë nuk janë një pamje e mirë për BE në ditën kur përkujtohet sulmi rus ndaj Ukrainës. Vetë Kallas e ka quajtur një "pengim", duke paralajmëruar se ekziston një plan B: rikthimi te përdorimi i aseteve të ngrira ruse.

"Qytetarët e Brukselit dhe Kievit”, është mbrojtur Orbán në mënyrë paradoksale duke harruar aktivitetet keqdashëse të Kremlinit, “po ndërhyjnë në zgjedhjet hungareze sepse duan që qeveria jonë patriotike të rrëzohet, në mënyrë që të imponojnë planet e tyre." Një qëndrim që ka irrituar pothuajse të gjithë partnerët. Gjatë samitit të djeshëm të ministrave të jashtëm, disa kanë përmendur nenin 7 të Traktatit të BE-së, i cili parashikon përjashtimin de facto të një shteti anëtar. Zgjidhje aktualisht e pazbatueshme dhe gjithsesi e pakëshillueshme para votimit në Hungari, për të mos i dhënë Orbánit një armë retorike në fushatën elektorale.

Në fund të javës pritet të zhvillohet një raund i ri negociatash midis Kievit dhe Moskës, por mbi vijën që duhet mbajtur ndaj Kremlinit nuk ka munguar një përplasje e re mes Gjermanisë dhe Francës. "Shumë oferta për dialog ndaj Rusisë”, ka thënë ministri i Jashtëm gjerman, Johann Wadephul, duke iu referuar ofertave për dialog të propozuara nga Elysee, “rrezikojnë të krijojnë përshtypjen se, me më shumë këmbëngulje, mund të arrihen gjithnjë e më shumë lëshime."

Rendit zhvillimet sipas orarit:
Ora 09:03
Përvjetori i katërt i luftës në Ukrainë, Zelensky: Putin nuk i ka arritur qëllimet

1770823639_volodymyrzelensky.JPG

Presidenti ukrainas, Volodymyr Zelensky

Në përvjetorin e katërt të luftës në Ukrainë, presidenti Volodymyr Zelensky deklaroi se Vladimir Putin nuk i ka arritur qëllimet e tij.

Zelensky, përmes një video mesazhi në rrjetet sociale, deklaroi se presidenti rus, Vladimir Putin nuk i ka thyer ukrainasit dhe se nuk e ka fituar luftën.

Ndër të tjera, Zelensky shtoi se ukrainasit do të bëjnë gjithçka për të siguruar paqen dhe drejtësinë.

“Sot shënohen saktësisht katër vjet që kur Putini filloi ofensivën e tij tre-ditore për të marrë Kievin. Dhe kjo thotë shumë për rezistencën tonë, për mënyrën se si Ukraina ka luftuar gjatë gjithë kësaj kohe. Pas këtyre fjalëve qëndrojnë miliona njerëz nga populli ynë, me një guxim të jashtëzakonshëm, punë jashtëzakonisht të palodhur, qëndrueshmëri dhe rrugën e gjatë që Ukraina ka ndjekur që nga 24 shkurti. Duke parë prapa në fillim të pushtimit dhe duke reflektuar mbi sot, kemi të drejtë të themi: ne e kemi mbrojtur pavarësinë tonë, nuk e kemi humbur shtetësinë tonë; Putini nuk i ka arritur qëllimet e tij. Ai nuk i ka thyer ukrainasit; ai nuk e ka fituar këtë luftë. Ne e kemi ruajtur Ukrainën dhe do të bëjmë gjithçka për të siguruar paqen dhe drejtësinë. Lavdi Ukrainës!”, shkruan Zelensky.

R.C/Shqiptarja.com