Janë krijuar shumë legjenda urbane, madje shumë analistë e kanë marrë në konsideratë një diskutim të tillë, ku shprehet habia se përse nuk janë paguar këshilltarët e Ministres teknike të Arsimit dhe të Sporteve.

Por teksa sheh në mënyrë të detajuar paditë e shtatë zyrtarëve të lartë të Ministrisë së Arsimit në drejtim të ministres teknike Karabina, vë re në mënyrë të qartë arsyen e mospagesës së këshilltarëve ‘teknikë’ të ministres teknike.

Zyrtarët e lartë të Arsimit, teksa i cilësojnë në kërkesë-padinë e tyre emërimet e këshilltarëve si të paligjshëm, ata japin dhe argumentin se përse janë të paligjshëm.

Sqarohet qartë se nuk kanë dorëzuar asnjë dokument identifikimi për ta depozituar në dosjen e tyre të personelit dhe për ta protokolluar. Ku sipas vendimit të Këshillit të Ministrave për dosjet e personelit, që duhet të përmbajë kërkesën, CV, diplomën, formularin e dekriminalizimit, dëshminë gjyqësore apo dëshminë të penalitetit siç quhet.

Dosja e personelit dhe për këshilltarët është personale, përmban gjithçka madje dhe masat disiplinore sipas vendimit të Këshillit të Ministrave dhe është e domosdoshme të jetë e depozituar në zyrën e personelit, tek burimet njerëzore.

Këshilltarët e Ministrës teknike nuk kanë dorëzuar asnjë dokument nga këto që përmban vendimi i KM, ndërkohë që për këtë arsye cilësohen si të paligjshëm dhe për pasojë dhe pagesa ndaj tyre është e paligjshme nëse realizohet.

Dhe është për tu habitur që ndërkohë që partia e cila propozoi Karabinën për ministre bëri një betejë të jashtëzakonshme për ligjin e ‘dekrimanilizimit’, këshilltarët e Ministres refuzojnë të dorëzojnë deklaratën e “dekriminalizimit”./Tema