​Pengoi auditimin e brendshëm në
Rektorat, pezullohet kanclari i UT

Rektori i Universitetit të Tiranës Prof. Dr Mynyr Koni, ka pezulluar Kancelarin e UT-së, Robert Skënderin pasi ky i fundit ka krijuar probleme në funksionimin e rregullt të institucionit.
 
Në deklaratën për shtyp të Drejtorisë së Komunikimit në Rektoratin e UT-së, thuhet se Skënderi ka penguar kryerjen e auditit të brendshëm në Rektoratin e UT-së dhe shkelje të tjera.
 
Pezullimi i Skënderit mban datën 3 gusht 2017 dhe është në fuqi deri në një urdhër të dytë.
 
Deklarata për shtyp e Drejtorisë së Komunikimit në Rektoratine UT-së
TIRANË 16/08/2017 - Rektori i Universitetit të Tiranës Prof. Dr Mynyr Koni me vendimin Nr. 116 datë 03/08/2017 ka pezulluar nga detyra Kancelarin e Universitetit të Tiranës z. Robert Skënderi. Ky vendim ka ardhur si pasojë e problemeve dhe pengesave gjithnjë e më të rënda të krijuara nga Kancelari i UT-së që kanë çuar në një situatë të paprecedentë në funksionimin e institucionit.
 
Duke evidentuar këto raste të paprecedenta, Kancelari i UT-së është pezulluar për shkeljen e Nenit 52 pika 1 / gërma ë) të Ligjit Nr. 80/2015 “Për arsimin e lartë dhe kërkimin shkencor në institucionet e arsimit të lartë në RSH” dhe Ligjit Nr. 10296 datë 08.07.2010 “Për menaxhimin financiar dhe kontrollin” të ndryshuar, duke mospërmbushur nevojat akademike, administrative dhe financiare për plotësimin e kërkesave të Rektorit të UT të parashtruara në rrugë zyrtare.
 
Gjithashtu, Kancelari i UT-së ka kundërshtuar dhe penguar kryerjen e auditit të brendshëm në Rektoratin e UT-së, sipas programit të angazhimit të auditimit miratuar me shkresën nr. 582/2 datë 22.06.2017 të Rektorit të UT-së.
 
Për të gjitha shkeljet e vërtetuara nga ana e kancelarit, janë bërë kallëzimet penale përkatëse në organin e Prokurorisë së Tiranës.

Vendimi për pezullimin e Kancelarti të UT-së, Robert Skënderit







Redaksia Online
Er.K/Shqiptarja.com

TAG:
• mynyr koni