‘Pagoi 1.5 mln Euro për privatizimin te Unaza e Re’/ Ministria e Financave: S’kemi kontratë me Begon, procesi nisi në 2007

Ministria e Financave dhe Ekonomisë ka reaguar duke hedhur poshtë akuzat e Partisë Demokratike, e cila deklaroi se Arben Ahmetaj ka firmosur në 2016 privatizimin e pronës së njohur te ish-sera, te Unaza e Re, ku sipas selisë blu biznesmeni Mond Bego do të ndërtojë një kompleks rezidencial (lexo këtu). PD akuzon gjithashtu se ishte “trafikanti Edmond Bego ai që i pagoi Ministrisë së Financave 1.5 milionë euro për privatizimin e ish serave”. Drejtori i Drejtimit të Pronës Publike Endrit Duçka në një deklaratë për mediat u shpreh se procesi i privatizimit ka nisur në vitin 2007 kur në pushtet ishte qeveria e drejtuar nga Berisha, ndërsa shtoi se në 2016 është lidhur kontrata e shitjes me trashgimtarët e familjes Pinari dhe jo Mond Begon, biznesmenin që PD e akuzon si të lidhur me qeverinë. Zyrtari i ministrisë së Financave dhe Ekonomisë theksoi se shuma në llogarinë e institucionit është depozituar nga firma “Inerte Expres”, e cila është themeluar nga Mond Bego në 13 shtator 2007 (lexo këtu). Megjithatë, Endrit Duçka thotë se ministria nuk mund të ndërhyjë apo të përfshihet në marrëdhëniet private mes individëve duke mbyllur reagimin me fjalët se “Nuk kemi lidhur asnjë kontratë me Edmond Begon”.

"Në 1995, Kthimi dhe Kompensimi i Pronave ka të njohur të drejtën e blerjes për ish-pronarët, trashëgimtar të familjes Pinari të pronës sera dhe magazina. Në 2007 me një shkresë urgjente u hap rruga për fillimin e procedurës së privatizimit. Po në 2007, brenda 20 ditësh është firmosur nga Genc Ruli. Ruli ka miratuar privatizimin për objektin sera dhe magazinë. Në 3 tetor 2014, prefekti dërgoi konfirmimin për gen planet e privatizimit. Në datë 06.10.2014, ZVRPP jep informacion e plotë për statusin e truallit. Në 12.11.2014 AKKP rikonfirmon vendimin e 1995 për pronësinë e objektit. Në 2015 komisioni i vlerësimit dërgon në drejtorinë e privatizimit dokumentacionin e vlerësimit dhe relacionin përkatës. Në 2016 ministria e Financave ka autorizuar kryerjen e pagesës së plotë për kthimin e pronës brenda 30 ditëve në favor të trashgimtarëve.

Në 09.06.2016 lidhet kontrata e shitjes, pjesë e dosjes së privatizimit. Bëhet fjalë për një proces që daton prej vitit 1995 me privatizimin e  miratuar dhe iniciuar nga qeveria e PD dhe ministri i kohës Ruli në 2007 brenda 20 ditësh. Procedura e ndjekur sipas të gjitha hapave nga kjo qeveri nga 2014-16. Në asnjë rast ministria e financave nuk ka lidhur apo privatizuar asnjë pronë me emrin Edmond Bego, ky person nuk figuron në asnjë dokument. Ministria e Financave nuk ka firmosur dokumente që të dalë përfitues ky person. Ministria ka autorizuar kalimin në pronësi të objekteve në sera dhe magazina në pronësi të Maliq dhe Hamdi Pinarit, trashgimtarët. Në llogari e Ministrisë së Financave është depozituar shuma nga firma Inerte Ekspres Sh.p.k pagesa është bërë për personat përfitues të pronës. Në asnjë rast institucioni nuk mund të ndërhyrë apo të përfshirë në marrëdhëniet private mes individëve. Nuk ka lidhur kontratë Edmond Bego" deklaroi zyrtari i ministrisë së Financave.

Por PD ka replikuar sërish duke vijuar me akuzat ndaj ministrit Ahmetaj. “Arben Ahmetaj bëri budallain për të mbuluar me burokraci të të vërtetën se ishte trafikanti Edmond Bego ai që i pagoi Ministrisë së Financave 1.5 milionë euro për privatizimin e ish serave. Është e provuar se “Inerte Ekspres” i përket plotësisht mikut të Taulant Ballës dhe se, nëpërmjet saj, janë bërë 4 pagesa për llogari të Ministrisë së Financave përpara se ajo të lidhte kontratën e privatizimit. Arben Ahmetaj mund të nxjerrë arkivin e Ministrisë së Financave, që nga krijimi i saj, por nuk mund të fshehë dot faktin se ai e privatizoi pronën vetëm pasi trafikanti i drogës  mori përsipër të mbyllë procedurën e privatizimit. A ka pjesë Arben Ahmetaj në projektin rezidencial 60 milionë euro që zhvendosi Lanën me firmën e Ramës dhe Veliajt? Përgjigja për këtë pyetje është vetëm çështje kohe”. PD akuzoi pak ditë më parë se Rama dhe Veliaj firmosën për të zhvendosur shtratin e Lanës te Unaza e Re për të prishur shtëpitë e mbi 200 familjeve që t’i hapin rrugë projektit të mikut të tyre trafikant droge (lexo këtu).

Faksimile e regjistrimit të kompanisë Inerte Ekspres në pronësi të Mond Begos, publikuar nga PD-ja

TAG:
• edmond bego
• protesta e astirit
• endrit ducka