Fati i PD, përcaktohet në Apel trupa gjykuese, relatore Elona Mihali! Sefa: Shqyrtoni sa më shpejt çështjen, tashmë s'ka asnjë pengesë

TIRANË- Pas shkrirjes së gjykatave të Apelit më datë 1 shkurt në të gjithë vendin dhe përqendrimin e tyre në një të vetme në Tiranë, të gjitha çështjet të cilat nuk kishin një datë të caktuar, janë rihedhur në short, për të caktuar gjyqtarët. Mes tyre ishte edhe ankimimi që Partia Demokratike e Alibeajt i ka bërë vendimit të gjyqtarit Agron Zhukri që i dha vulën e partisë Sali Berishës më 25 mars.

Shorti i hedhur sot, ka caktuar që çështja e vulës së Partisë Demokratike në Apel, do të shqyrtohet nga Elona Mihali e cila do të jetë gjyqtare relatore, ndërsa anëtarë janë caktuar gjyqtarët Irida Kacerja e Astrit Kalaja. Grupi i Rithemelimi ka kërkuar që të caktohet sa më parë një datë, ndërsa tashmë do të jenë 3 gjyqtarët që do të vendosin se kur do të marrin në shqyrtim çështjen e animimit të PD-së.

Një reagim pati edhe nga Grupi i Enklejd Alibeajt. Përfaqësuesi i tyre ligjor i tyre, Indrit Sefa ka depozituar një kërkesë për gjyqtaren Elona Mihali, së cilës i kërkon që ta marrin çështjen në shqyrtim sa më parë. Sefa shkruan se çdo vonesë është e pajustifikuar dhe se tashmë Apeli s’ka asnjë pengesë për t’i dhënë fund konfliktit të PD-së.           

Irida Kacerja, edhe më parë ka qenë pjesë e trupit gjykues për çështjen e ankimimit të Partisë Demokratike, për të cilën grupi i Alibeajt, kërkoi përjashtimin e saj, por gjyqtarja relatorë e hodhi poshtë kërkesën e tyre, pasi vlerësoi se kishte nuk shkaqe papajtueshmërie.

Anëtari tjetër i trupit gjykuese është gjyqtari Astrit Kalaja, një emër i njohur për drejtësinë, sidomos për shkak se ka qenë anëtar i Kolegjit Zgjedhor edhe gjatë zgjedhjeve lokale të 2011, duke vendosur për fituesin në atë kohë të garës për drejtimin e Bashkisë së Tiranës. 

Kujtojmë se kryekomisioneri Celibashi Ilirjan paralajmëroi se nëse nuk zgjidhet ngërçi brenda PD-së, rrezikon që partia më e madhe opozitare të mos futet në zgjedhjet vendore të 14 majit. Celibashi kërkon që konflikti të zgjidhet para zgjedhjeve, ndërsa theksoi se duhet të angazhohet të gjithë aktorët politikë e institucionalë, pasi këtë ngërç nuk mund ta zgjidhë KQZ.

Mbetet për t’u parë nëse Ilirjan Celibashi do të veprojë njësoj si në zgjedhjet e pjesshme vendore të 6 marsit, kur i mbylli derën Sali Berishës pasi mori vendimin që të njihte përfaqësuesit ligjorë të Lulzim Bashës. Kjo detyroi Berishën që të bashkëpunonte me LSI-PDK, të cilët krijuan koalicionin "Shtëpia e Lirisë" dhe futën në garë kandidatët e zgjedhur nga ish kryeministri. 

Deri më tani, në gjykatën e Tiranës rezulton ende kryetar Lulzim Basha që dha dorëheqjen, ndërsa vendimi që pritet të ndajë përfundimisht se kush e ka drejtimin e partisë mes kryetarit të komanduar Alibeaj dhe Berishës, është ai i Apelit që deri më tani është shtyrë disa herë. Megjithatë, për të shmangur ngërçet e mundshme, gjykata duhet të vendosë të paktën deri më 6 mars kur është edhe afati i fundit për regjistrimin zyrtar të partive politike në KQZ për garën elektorale të 14 majit.

Rendit zhvillimet sipas orarit:

Të Fundit Të Parat

M.Q./SI.E./Shqiptarja.com

TAG:
• Lufta brenda PD
• gjykata e apelit
• elona mihali
• irida kacerja
• Astrit Kalaja