Lihet në burg Redjan Rraja: S'kam lidhje me atentatin ndaj prokurorit! Gjurmët e tij u gjetën në syzet brenda makinës

Gazetari i Report Tv Arsen Rusta shprehet se pritet që të ekzekutohen edhe tre urdhër arreste të tjera lidhur me atentatin kundër prokurorit. Ndërkohë që gazetari i Shqiptarja.com, Elton Qyno thotë se grupi hetimor në makinën e autorëve që u gjet e padjegur ka gjetur shenja të tjerë gishtash, që janë duke u verifikuar për të shkuar te autorët e tjerë që morën pjesën në skuadrën e atentatit kundër prokurorit Ndoja.

Avokati i Redjan Rrajës, Besnik Cerekja deklaroi në përfundim të seancës te Krimet e Rënda se klienti i tij nuk ka pasur konflikte me prokurorin dhe se nuk ka qenë i përfshirë në atentatin kundër tij. Ai tha se prokuroria solli si prova gjurmët në një nga sendet (syzet) që u gjetën në makinë.

"Nuk ka asnjë lidhje, nuk është i përfshirë në këtë histori. Të njëjtën gjë konfirmuam dhe ne, kontestuam provat që pretendojnë prokurorët, qoftë për ligjshmërinë e arrestimit qoftë për caktimin e masës së sigurisë "arrest me burg". Prokuroria solli si prova gjurmë të gishtërinjve në një nga sendet që ndodheshin në makinë. Akuzohet për një sërë veprash penale, që nga vjedhja deri të vrasja e funksionarëve të lartë të mbetur në tentative. Rraja ndodhej në Shqipëri në momentin e atentatit, nuk po tentonte që të largohej, ishte në mjetin e tij, me pasaportën e tij, normalisht. Nuk janë gjetur shenjat e gishtërinjve përveç objektit. Redjani deklaroi vetëm 'Jam dakord me mbrojtjen dhe shpresoj drejtësia të bëjë punën e saj".

Gjykata e Krimeve të Rënda ka vendosur sot që të lerë në burg pa afat atentatorin e prokurorit Arjan Ndoja që u arrestua tre ditë më parë. Redjan Rraja ishte i pranishëm në gjykatë, ndërsa pavarësisht pretendimeve të avokatit, me kërkesë të dy prokurorëve Anton Martini dhe Besim Hajdarmataj gjykata e ka lënë në burg.  Seanca që zgjati rreth një orë u zhvillua me dyer të mbyllura, pasi sipas prokurorëve përbën sekret hetimor. Report Tv siguron pamjet e momentit kur Rraja futet në ambientet e Gjykatës së Krimeve të Rënda.

Redjan Rraja prej orës 14:00 ndodhet në seancën që po zhvillohet te Krimet e Rënda për t'u njohur me masën e sigurisë. Gazetari i Report Tv Arsen Rusta raporton, Rraja është i pranishëm, por seanca me kërkesë të prokurorëve po zhvillohet me dyer të mbyllura pasi sipas tij përbën sekret hetimor. Dosja drejtohet nga dy prokurorët Anton Martini dhe Besim Hajdarmataj.

Në makinën Mercedes me targë AA 234 LM që atentatorët e prokurorit Arjan Ndoja braktisën pasi lëshuan breshëri automatiku ndaj makinës së tij, janë gjetur një palë syze, gjurmë gishtash, bishta cigaresh, fije floku dhe prova të tjerë. Gjurmët e gishtërinjve nga hetimet e kryera i përkasin Redjan Rrajës, të vënë në pranga si një nga atentatorët e dyshuar. Është pikërisht kjo provë e fortë e gjetur në makinë, që ka çuar hetuesit drejt Redjan Rrajës, kushëri i deputetit socialist Rrahman Rraja.

Në makinën e autorëve policia gjeti dy bidonë me benzinë, por që nuk arritën që ti vendosnin flakën për të zhdukur gjurmët. Gabimi bëri që të mos arrinin që të zhduknin provat. I vetëdijshëm që gabimi do i kushtonte, Rraja tentoi që të largohet drejt Malit të Zi për t'u arratisur, por u prangos.

Dyshimet janë se nëse faktohet që ai është autori, mund të jetë vrasës me pagesë, pasi deri më tani nuk ka të dokumentuara konflikte të mëparshme mes tij prokurorit Ndoja, apo dhe dy personave të tjerë që ndodheshin në makinë dhe mbetën të plagosur, Landi Muharremit nga Sukthi, dhe shoferit të prokurorit, Andi Maloku.

Redjan Rraja

Report Tv siguron foton e Redjan Rrajës që u arrestua si autor i dyshuar i atentatit kundër prokurorit Arjan Ndoja. Ai do të dalë në orën 14:00 para gjykatës ku do të njihet me masën e sigurisë.