Mbrëmjen e sotme, qyteti i Korçës ka ndezur në mënyrë simbolike dekorimet festive, duke shënuar nisjen zyrtare të sezonit të fundvitit.

Sheshi i qytetit u mbush me qytetarë dhe vizitorë, ndërsa numërimi mbrapsht dhe ndezja e dritave krijuan atmosferën e parë të festimeve që do ta shoqërojnë Korçën gjatë gjithë muajit dhjetor.

Në fjalën e tij Sotiraq Filo, kreu i bashkisë, theksoi se Korça është tashmë 100% e rezervuar për të gjitha ditët e festave, ndërsa për periudhën deri në natën e ndërrimit të viteve është përgatitur një kalendar i pasur aktivitetesh dhe një ofertë konkurruese turistike.

Mbrëmja e ndezjes së dritave u shoqërua me një koncert festiv, ku atmosfera festive dhe pjesëmarrja e lartë e qytetarëve dhanë sinjalin se Korça edhe këtë vit mbetet një nga destinacionet më të kërkuara për fundvitin.

Qytetarët dhe vizitorët shprehen se atmosfera e sotme ishte tepër e veçantë, ndërsa numri i lartë i njerëzve në shesh tregoi edhe një herë se Korça është shndërruar në një kryeqendër të turizmit të fundvitit në vend.


Lajmi kryesor:

Magjia e fundvitit në vend, Tirana ‘ndizet’ nën dritat e festave! Mijëra qytetarë në sheshet e Shqipërisë (VIDEO)