Partia Demokratike do të tërhiqet nga procesi për zgjedhjen e Avokatit të Popullit. Qëndrimi u bë me dije nga kryetari i PD-së, Sali Berisha pas mbledhjes së Komisionit të Ligjeve ku vetëm me votat e PS emrat e 6 kandidatëve u kaluan për votim në seancës plenare të së enjtes, ndonëse PD kishte deklaruar tërheqjen nga firmat.

Sipas Sali Berishës, mazhoranca po bën lojë të pisët për të zgjedhur emrin e Endri Shabanit në krye të këtij institucioni.

“Narkomazhoranca ka bërë një lojë të turpshme. Ne kemi qenë të bindur në intrigat dhe banalitetin e tyre. Balla informoi se avokatin e Popullit ia kemi lënë opozitës, unë iu thash juve se ata do pendohen dhe tani tregojnë se u penduan. Mund ta imagjinoni këtë? Opozita ka tërhequr të gjitha firmat për kandidaturat e tjera, përveç kandidaturave të përzgjedhura vetë, që jam Beism Ndregjoni, Kalaja, Jola Hysaj, Aranita Braja, Haluci, Dardan Mustafa. Sot futën kandidaturën e tyre. Kandidatura kishte marrë firmat, por ne i tërhoqëm. Manja thotë se nuk njoh Taon, dhe nuk njoh tërheqjen e firmave. Arrijnë deri këtu për të nxjerrë atë që thotë Rama. Ne tërhiqemi nga procesi, ne nuk jemi më palë në procesin e zgjedhjes së avokatit të popullit”, tha Berisha.

Në votimin e së enjtes, Berisha tha se nuk të marrin pjesë, duke e konsideruar një proces farsë.

“Histori e turpshme e Ramës, por ne një farsë nuk marrim pjesë. Ne u treguam të arsyeshëm, nuk tham ose ky, ose asnjë tjetër, ne paraqitëm disa kandidatura, ata shtuan kandidaturat e tyre. Është Endri Shabani. PD tërhiqet nga procesi, PD nuk merr pjesë në proces, kjo është një turp i këtyre. Ne nuk marrim pjesë në votim farsë, kjo që bën është akt i ulët, primitiv i Ramës. Do shkojë një person që s’ka asnjë lidhje me opozitën”, vijoi Berisha.

Kreu i PD vijoi me akuzat ndaj kryeministrit Rama se po i ushtron presion Gjykatës Kushtetuese, ndërsa tha se do të organizojnë protesta kombëtare.

Rendit zhvillimet sipas orarit:
Ora 13:07
Çështja Balluku / Berisha akuza Ramës: Po i ushtron presion Gjykatës Kushtetuese, po lufton që të mbrojë veten

 

Sali Berisha iu rikthye sërish çështjes së Belinda Ballukut në konferencën për mediat, duke akuzuar kryeministrin Edi Rama se po i ushtron presion Gjykatës Kushtetuese. Kreu i PD thotë se Rama ka vetëm hallin e tij dhe po përpiqet të mbrojë veten.

Berisha aludoi se kërcënime dhe metoda të tjera kriminale po përdoren nga mëngjesi deri në darkë në drejtim të Gjykatës Kushtetuese, e cila më datë 12 dhjetor pritet të vendosë përmes Mbledhjes së Gjyqtarëve nëse ankimi i kryeministrit do të kalojë ose jo për shqyrtim.

“Sulmet ndaj Kushtetueses në këtë çështje janë të pa para ndonjëherë në historinë e këtij vendi. Kërcënimet dhe metoda të tjera kriminale po përdoren nga mëngjesi deri në darkë, për shkak të tyre gjykata në kundërshtim me çdo ligj dhe precedent pranoi të shqyrtojë kërkesën. U dha edhe kohën e mjaftueshme për të ushtruar të gjitha format e presionit. Mbetet vetëm fjala dhe guximi juaj për të folur për vete për çdo shqiptar kudo që është, për mbarë europën dhe botën. Kjo përpjekje tij për të mbrojtur veten përmes Kushtetueses, do ketë pasoja direkt mbi të. Se populli shqiptar s’do ta pranojë kurrë një turpërim të tillë. Mashtrimi i tij duke cituar ditë më parë Komisionin e Venecias mori përgjigjen më të merituar nga ekspertë të shqyrtuar se ky komision nuk ka asnjë paragraf në të cilin të shprehet se nuk mund të pezullohet ministri. Tani nuk e përmend më, duket se ka pasur reagime. Tani ka vetëm hallin e tij, por hallin e tij e ka krijuar vetë duke urdhëruar Ballukun, duke e bërë bashkëpunëtore në krim, Rama është pa kurrfarë mbrojtje. Ajo e ka marrë vendimin do të të marrë me vete. Vlerësoj reagim e shoqatës së gjyqtarëve si një reagim në mbrojtje të ligjit dhe kushtetutës”, tha Berisha.

Ironia është se Berisha akuzon Ramën për sulme e presione, por duket se harron sulmet e tij të përjavshme para derës së SPAK në drejtim të Altin Dumanit apo Irena Gjokës.

SI.E./Shqiptarja.com