Avokati Zaçe Islami ka qenë i ftuar mbrëmjen e sotme në ‘Studio Live’ në Report Tv për të diskutuar për një zërë çështjesh të zhvillimeve të fundit në vend.

Islami komentoi dhe operacionin e SPAK të realizuar ditën e sotme në bashkëpunim me ndërkombëtarët ku në pranga ranë 10 persona mes tyre dhe djali i ish-deputetit socialist Rrahman Rraja, të përfshirë në trafikun e drogës.

Sipas avokatit Islami, grupet kriminale dhe eksponentët kriminalë mbrohen nga shteti, ndërsa shton se policia nuk e kryen plotësisht detyrën.

“Drogën e mbron direkt qeveria shqiptare, direkt kryeministri. Çfarë i pengon këta që të shkojë të zbulojnë drogën në Krujë që është një dorë vend. Ju e thatë që janë njerëz të ish-deputetit Rraja, çfarë faktesh doni.

Këta duan të thonë që ka bërë punë policia, kapin një pako hashash të mykur, i bëjnë foto i vënë dhe flakën”, tha avokati.

Zaçe Islami foli dhe për zgjedhjen e kreut të SPAK ditën e nesërme, për të cilin tha se është një institucion në varësi të pushtetit.

“SPAK është tërësish i varur nga kryeministri dhe nuk mund të jenë të pavarur. Vetëm nëse do të ishin të votuar nga populli do të ishin të pavarur”, tha ai.

Avokati Islami është shprehur gjithashtu kundër ligjit të miratuar së fundmi në Kuvend për Barazinë Gjinore. Ai thotë se ky ligj është një turp dhe se shkatërron familjen shqiptare.

“Unë nuk e konsideroj ligj, e quaj turp kombëtar. Të bësh ligj domethënë t’i diskriminosh. Kush është ky që kërkon mbrojtjen e tyre. Çfarë është nevoja që shteti të merret me ata dhe të mos merren me shkollimin e fëmijëve. Unë nuk i konsideroj aspak. Ky e shkatërron familjen. C’punë ka parlamenti më ta kur ka dhjetëra probleme të tjera”, tha ndër të tjera avokati.