Kreu i Grupit Parlamentar të PD-së Gazment Bardhi ka replikuar me kreun e grupit të PS-së, Taulant Balla, pasi ky i fundit i cilësoi protestuesit që kanë kryer akte dhune në Tiranë si “huliganë” dhe një pjesë të tyre si “hajdutë bankash”. Në një postim në rrjete sociale Bardhi akuzon mazhorancën se po sulmon qytetarët që protestojnë për t'iu shmangur llogaridhënies për korrupsionin dhe abuzimin me pushtetin.

"Fyerjet dhe balta e hedhur mbi qytetarët që protestojnë janë bërë streha e fundit e një pushteti që nuk dëshiron të përballet me të vërtetën. Shqipëria e di se kush duhet të japë llogari për korrupsionin, abuzimin me pushtetin dhe vjedhjen e besimit të qytetarëve. Përgjegjësia nuk mund të fshihet pas sulmeve ndaj protestuesve, as të relativizohet përmes propagandës.

Kur qytetarët kërkojnë drejtësi dhe llogaridhënie, ndërsa pushteti përdor votën parlamentare për të penguar arrestimin e zyrtarëve të dyshuar, atëherë lindin pyetje serioze për standardet e barazisë para ligjit. Askush nuk mund të jetë mbi ligjin.

Qytetarët që protestojnë nuk mund të bëhen objekt fyerjesh vetëm sepse kërkojnë përgjegjësi. Shqipëria ka nevojë për drejtësi, transparencë dhe institucione që mbrojnë interesin publik, jo për një pushtet që u shmanget llogaridhënies dhe sulmon ato që kërkojnë llogari dhe përgjegjës"