Kreu i PD, Lulzim Basha, nga akuzues i Taulant Ballës për ngarkesën e 3.4 milionë eurove, është akuzuar nga kreu grupit parlamentar socialit se ka njohje me vëllanë e Alfred Vladit, njërin prej dy personave të shpallur në kërkim.

E ndërsa Lulzim Basha la sallën e Parlamentit, Taulant Balla e surprizoi kur nxori një foto, ku kryedemokrati ka pozuar brenda ambienteve të zyrës në PD me disa persona, ku në të djathtë të tij, sipas Taulant Ballës, qëndron vëllai i Alfred Vladit.

(Lulzim Basha me vëllanë e njërit prej kushërinjve Vladi, të shpallur në kërkim)

Ja ku je me vëllain e njërit prej dy personave që porositën eurot, Vladi, në zyrë. Vëllai i mikut të Lulzimit në zyrën e Lulizmit, kjo tani i takon drejtësisë. Këtë provë do t’ia dorëzoj sot drejtësisë. Ky derdimen që e keni bërë kryetar partie është i paaftë, por edhe budalla.

Taulant Balla, kreu i grupit parlamentar të PS

Akuzat dhe kundër akuzat mes Lulzim Bashës dhe Taulant Ballës nisën të enjten e shkuar po në sallën e Parlamentit, kur kryedemokrati Basha deklaroi se “Taulant Balla ka marrë “Toyota Yaris”, por iu zbulua “Toyota” bashkë me 1.5 milionë euro të drogës brenda.

Ky deklarim i Bashës u konsiderua nga Balla si dekonspirim i operacionit policor, i cili nisi të nesërmen, pasi Lulzim Basha bëri publik informacionin në Parlament.

Paraditen e të mërkurës, Taulant Balla iu drejtua Prokurorisë me dy padi ndaj Lulzim Bashës për dekonspirim të operacionit policor po ashtu edhe për shpifje.