Greqia do ta ketë zgjerimin e Bashkimit Europian me vendet e Ballkanit Perëndimor si një nga prioritetet kryesore gjatë presidencës së saj të Këshillit të BE-së në gjysmën e dytë të vitit 2027.

Këtë e deklaroi ministri i Jashtëm grek, George Gerapetritis, gjatë një vizite në Sarajevë, pas takimit me homologun e Bosnje-Hercegovinës, Elmedin Konakoviç.

Sipas tij, Athina do të punojë për të siguruar progres konkret në procesin e zgjerimit dhe do të vijojë të mbështesë integrimin europian të vendeve të Ballkanit Perëndimor.

Megjithatë, Gerapetritis theksoi se anëtarësimi në Bashkimin Europian mbetet i lidhur me përmbushjen e kritereve të kërkuara nga Brukseli, përfshirë standardet mbi demokracinë, sundimin e ligjit dhe marrëdhëniet e mira fqinjësore.

“Greqia mbështet prej kohësh perspektivën europiane të Ballkanit Perëndimor, por progresi varet nga respektimi i kritereve dhe vlerave të Bashkimit Europian”, tha ai.

Gjatë vizitës në Sarajevë, ministri grek njoftoi gjithashtu se fluturimet direkte mes Athinës dhe Sarajevës do të rifillojnë në muajin tetor.