POP 5

Lajmet më të lexuara të 5 minutave të fundit

Kronikë

Banorët e Vunoit të frikësuar nga vjedhja e banesave, brenda 2 muajve 15 grabitje

Vjedhja e banesave në fshatin Vuno është shndërruar në një problem serioz për banorët. Sipas tyre, kjo situatë ka ngjallur frikë kryesisht tek të moshuarit, të cilët nuk dalin nga banesat nga frika se mos u vjedhin shtëpinë.

Në kulmin e sezonit turistik, vjedhja e banesave në fshatin Vuno pranë Bashkisë së Himarës është shndërruar në një problem serioz për qytetarët. Ata denoncojnë në "Report Tv" këtë situatë, teksa bëjnë të ditur se brenda 2 muajve në Vuno janë vjedhur mbi 15 banesa nga një grup hajdutësh që policia ende nuk e ka kapur.

Sipas banorëve, kjo situatë ka ngjallur frikë kryesisht tek të moshuarit, të cilët nuk dalin nga banesat nga frika se mos u vjedhin shtëpinë. Vjedhja e fundit në Vuno, sipas dëshmive të banorëve të zonës ka ndodhur ditën e djeshme. 

Edhe pse gjatë sezonit veror Komisaritatit të Himarës i janë shtuar forca të tjera policore, që patrullojnë përgjatë gjithë zonës së bregdetit, situata e grabitjeve mbetet shqetësuese. "Report Tv" ka kontaktuar me përfaqësues të Policisë në Himarë dhe në Drejtorinë e Policisë Vlorë, të cilët kanë pranuar situatën problematike, ndërsa u kanë bërë thirrje qytetarëve që të denoncojnë çdo rast të grabitjes, pasi bashkëpunimi me policinë do t’i vijë në ndihmë uniformave blu edhe për kapjen ose identifikimin e autorëve.

Sipas policisë, në mjaft raste qytetarët i neglizhojnë denoncimet për vjedhje në polici, duke mos pasur besim te zbardhja e këtyre ngjarjeve. Por banorë të zonës nga ana tjetër shprehen se i kanë bërë denoncimet në polici, por grabitësit nuk janë kapur dhe situata e vjedhjeve vijon po njësoj.

Dyshohet se grabitësit janë banorë të zonave ku kryejnë vjedhjet, pasi ata i studiojnë lëvizjet e qytetarëve për të gjetur momentin e përshatshëm të grabitjes kur në shtëpi nuk ka njeri.

/b.ha./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Tragjedia në Shkodër, a duhet gratë të denoncojnë çdo formë dhune?

Lajme të tjera



×

Lajmi i fundit

Çfarë synon vizita e Presidentit kinez në Serbi?

Çfarë synon vizita e Presidentit kinez në Serbi?

6 Maj, 19:57