Basha: Drejtësia në duart e krimit, Rama kontrollon çdo institucion në Durrës

TIRANE - Kryetari i Partisë Demokratike, Lulzim Basha akuzon se kryeministri Edi Rama përmes Vangjush Dakos dhe krimit të organizuar kontrollon pushtetin lokal, drejtësinë dhe çdo institucion tjetër të Durrësit.

“Edi Rama përmes Vangjush Dakos dhe krimit të organizuar kontrollon pushtetin lokal, drejtësinë dhe çdo institucion tjetër të Durrësit. Bashkëpunëtori i bandës kriminale të Avdylajve, liruesi nga burgu i Lul Berishës dhe pastruesi i parave të krimit në Durrës, duhet të ishte në burg, por ai është padroni i atyre që që duhet ta dërgonin në burg”, shkruan Basha në rrjetet sociale.

Sipas tij drejtësia në të gjithë Shqipërinë është sot në duart e krimit dhe të organizatës kriminale të rilindjes.

“Sot mes rilindasve dhe krimit nuk ka më asnjë ndryshim. Jemi kthyer në kohët e errëta, kur drejtësia ishte partia kriminale. Me këtë drejtësi nuk do ketë kurrë politikanë në pranga, nuk do ketë kurrë kriminelë në burg. Me këtë drejtësi, prangat janë për njerëzit e thjeshtë dhe krimi e hajdutëria qeveritare bëjnë kërdinë. Çlirimi i vendit nga sundimi i Edi Ramës dhe bandës së tij në qeveri është domosdoshmëri për demokracinë, shtetin e së drejtës dhe stabilitetin e vendit”, shkruan më tej Basha.

Dje Gjykata e Durrësit i dha mandatin kryebashkiakes Valbona Sako, me një vendim pas atij të gjyqtares Mimoza Margjeka që refuzoi t'i japë vërtetimin e mandatit të certifikuar nga Komisioni Qendror i Zgjedhjeve. Vendimi u dha nga gjyqtari Shpëtim Reka, pasi Partia Socialiste shfrytëzoi hapësirën ligjore për të bërë një tjetër kërkesë, këtë radhë jo nga kandidatja, por nga vetë Partia Socialiste si subjekt politik, kryetar i së cilës është Edi Rama.

G.M.//Shqiptarja.com

TAG:
• edi rama
• lulzim basha
• kriza politike