Kryetari i Partisë Demokratike, Lulzim Basha, ka ripërsëritur qëndrimin e tij se Qeveria është shumë vonë me masat për përballimin e pandemisë në vend.

Përmes një postimi në Twitter, teksa nënvizon qëndrimin e tij se ekonomia e vendit është në krizë dhe shëndetësia në kolaps, deklaron se Rama nuk e ka zbatuar planin e masave të opozitës, plan të cilin e ka propozuar që prej 6 muajsh.

"Shumë pak, shumë vonë. Ka mbi 6 muaj që kemi propozuar plan masash për të përballuar pandeminë. Fatkeqësisht Rama nuk e ka zbatuar. Sot e kësaj dite, Shqipëria është e fundit në çdo fushë. Ndihma ekonomike për është më e ulëta. Shëndetësia është në kolaps. Ekonomia në krizë.

Shqipëria ka nevojë për shpresë të re. Vendi ka nevojë për një qeveri që kujdeset për qytetarët e tij dhe fuqizon ekonominë. Ne jemi të vetmit që mund ta bëjmë këtë! Është koha që Shqipëria të ketë një qeveri që punon për njerëzit", shkruan Basha në Twitter.