Një grup protestuesish kanë hyrë brenda ambienteve të Universitetit Politeknik të Tiranës dhe u kanë bërë thirrje studentëve të bojkotojnë mësimin dhe t’i bashkohen tubimit.

Të paktë në numër, me thirrjet ‘bashkohuni me ne’, protestuesit mbajnë në duar edhe pankarta me mbishkrime të ndryshme dhe kërkojnë largimin e Qeverisë.

Në hyrje të Politeknikut ata vendosën edhe 10 karrige me fotografi të protestuesve të lënduar nga përplasjet me Policinë gjatë tubimeve, si dhe disa letra të bardha me mbishkrimet 'Diktator'.

Më pas ata kanë marshuar drejt Fakultetit Ekonomik dhe drejt atij të Inxhinierisë, duke vijuar me thirrjet drejtuar studentëve për të bojkotuar mësimin dhe për t'ju bashkuar protestës. Në fund janë ndalur te Ministria e Arsimit.

Policia ka shoqëruar disa prej protestuesve dhe ka bërë të mundur rikthimin në normalitet të qarkullimit në Rrugën e Durrësit.

Gjatë dy ditëve të fundit, në protestën e zhvilluar në Tiranë ka pasur një numër të ulët pjesëmarrësish dhe nuk janë regjistruar akte dhune si në tubimet e zhvilluara më herët.

Lajm në përditësim…

Rendit zhvillimet sipas orarit:
Ora 16:17
Pas marshimit drejt fakulteteve, një grup protestuesish mblidhen në sheshin 'Skënderbej' ( VIDEO)

 

Sot protestuesit marshuan nga Universiteti Politeknik i Tiranës drejt Fakultetit Ekonomik dhe atij të Inxhinierisë, ku u bënë thirrje studentëve t'i bashkohen protestës.

Ata u kërkuan studentëve të bojkotojnë mësimin, ndërsa më pas një grup protestuesish janë zhvendosur në sheshin ‘Skënderbej’.

Aktualisht, disa prej tyre janë mbledhur aty.

A.C/Shqiptarja.com

Ora 16:16
Protestuesit marshojnë para selisë së PD, thirrje në kor: Parti Demokratike, si u shite gjithë këto vite (VIDEO)

 

Gjatë marshimit të tyre nëpër kryeqytet, protestuesit kanë kaluar edhe para selisë së Partisë Demokratike, ku përsëritën ‘refrenin’ e tyre.

“Parti Demokratike, si u shite gjithë këto vite.”

Me këtë shprehje, ata shfaqin pakënaqësinë ndaj forcës kryesore të opozitës në vend. Kujtojmë që edhe të shtunën e kaluar, kjo ishte ndër frazat me të cilat pritën militantët e PD kur mbërritën te Ministria e Arsimit. Gjithashtu, ata iu drejtuan edhe me thirrjen “opozita jemi ne.”

P.J/Shqiptarja.com

Ora 16:14
Policia shoqëron disa protestues te Ministria e Arsimit, rikthehet në normalitet qarkullimi i mjeteve (VIDEO)

 

Policia ka shoqëruar disa protestues që ishin mbledhur ditën e sotme te Ministria e Arsimit.

Pas ndërhyrjes, efektivët e Policisë kanë rikthyer në normalitet qarkullimin e automjeteve në Rrugën e Durrësit.

Numri i protestuesve prezentë sot para Ministrisë së Arsimit, ishte i ulët krahasuar me ditët e tjera dhe kjo bëri që për grumbullimin e tyre të mos ishte i domosdoshëm bllokimi i rrugës.

R.Xh/Shqiptarja.com

Ora 14:08
Protestuesit marshojnë drejt Ekonomikut dhe Inxhinierisë, ndalen te Ministria e Arsimit! Thirrje për dorëheqjen e Qeverisë (VIDEO)

 

Pasi u futën brenda Universitetit Politeknik të Tiranës, ku u bënë thirrje studentëve që të bojkotojnë mësimin dhe t’i bashkohen tubimit kundër Qeverisë, me të njëjtat thirrje protestuesit marshuan edhe te Fakulteti Ekonomik dhe ai i Inxhinierisë.

Në përfundim të marshimit të tyre, grupi i protestuesve u ndal para Ministrisë së Arsimit, ku po bëjnë thirrje për dorëheqjen e kryeministrit Edi Rama.

R.Xh/Shqiptarja.com

Ora 10:56
'Diktator'- Studentët vendosin para Politeknikut 10 karrige me fotografi të protestuesve të lënduar (VIDEO)

 

Një grup studentësh kanë vendosur para Universitetit Politeknik të Tiranës 10 karrige në mënyrë simbolike, sipër të cilave janë vendosur fotografi nga raste të ndryshme nga protesta, ku kanë mbetur të lënduar disa protestues.

Sipas secilës karrike është edhe nga një letër e bardhë me mbishkrimin ‘Diktator’, që i referohet kryeministrit Edi Rama.

R.Xh/Shqiptarja.com