'Partizani'/ Sali Berisha në arrest shtëpie me mbikëqyrje policore! I ndalohet komunikimi! GJKKO jep vendimin, oficerët e ekzekutojnë

Momenti kur oficerët e BKH dhe të Krimit Ekonomik shkojnë në shtëpinë e Berishës për t'i komunikuar masën, ka vetëm gazetarë

Arresti në shtëpi me mbikqyrje policore periodike duke i kufizuar dhe komunikimin, ka qenë një nga ngjarjet më të rënda dhe ndoshta më e vështira në 33 vite politikë për Sali Berishën.

E pikërisht në këtë ditë ish kryeministri duket se është braktisur dhe nga ai grup militantësh sa një grusht që e mblodhi para pak ditësh para Gjykatës së Lartë kur po zhvillohej gjyqi për vulën e PD.

Kështu, Berisha arrestin në shtëpi e priti i vetmuar, pa mbështetës në seli apo pranë shtëpisë ndërsa i pari që i doli në mbrojtje ishte i biri Shkëlzeni.

Edhe aleatët e dikurshëm opozitarë sot kanë heshtur, ndërsa reagime të nxituara pati Gazment Bardhi dhe Ilir Meta, kurse PD zyrtare dhe vetë Basha nuk kanë reaguar. 

Vetëm pak orë pas dhënies së arrestit në shtëpi, heshtjen e theu vetë Berisha në rrjetet sociale duke e quajtur masën e sigurisë hakmarrje politike.

Dy mbrojtësit e Sali Berishës, Genc Gjokutaj dhe Sokol Mëngjesi kanë dalë me një deklaratë të përbashkët për shtyp të ngjashme me ato të selisë së Rithemelimit për të kundërshtuar vendimin e GJKKO për të pranuar kërkesën e SPAK duke i caktuar Sali Berishës masë sigurie arrest në shtëpi dhe me mbikqyrje periodike policore.

Duke bërë një renditje kronologjike të të gjithë procedurave që janë ndjekur deri te arresti në shtëpi për Berishën, pavarësisht se ky i fundit nuk respektoi masën e parë detyrim paraqitje, avokatët përsëri e quajnë vendim politik.

“GJKKO vrapoi të pranonte kërkesat e prokurorëve politikë, në shkelje të Kushtetutës dhe Kodit të Procedurës Penale (KPP)”, thuhet mes të tjerash në deklaratën për shtyp.

Deklarata e plotë

Deklaratë e avokatëve të Kryetarit të Partisë Demokratike, Prof. Dr. Sali Berisha. Gjykata izolon Sali Berishën me urdhër politik në kundërshtim me ligjin Arben Kraja, ish-oficeri i policisë sekrete i regjimit komunist, i konvertuar në Prokuror Special Kundër Korrupsionit dhe Krimit të Organizuar, si dhe prokurorja Enkeleda Millonai, e përfolur për lidhjet e saj me rrjetin kriminal të PS, kërkuan për kryetarin e PD-së Sali Berisha arrest shtëpie, me mbikëqyrje policore dhe ndalim të plotë komunikimi.

Gjykata Speciale Kundër Korrupsionit dhe Krimit të Organizuar (GJKKO) më datë 20.10.2023, pas urdhrave publikë politikë të Edi Ramës, mori vendim për caktimin e dy masave të kufizimit të lirisë ndaj Sali Berishës, ish-president dhe ish-kryeministër i Shqipërisë dhe kreut aktual të Partisë Demokratike të Shqipërisë, përkatësisht ndalim dalje nga vendi dhe detyrim paraqitje dy herë në muaj para prokurorisë.

Këto masa ishin në kundërshtim flagrant me garancitë kushtetuese, të cilat ofrojnë imunitet për deputetët. Masa të tilla si kufizimi i lirive të deputetëve, pengimi i lëvizjes së tyre jashtë shtetit, kontrolli i banesës, si dhe liri të tjera kushtetuese, si ajo e shprehjes, e ushtrimit të funksioneve politike, kërkojnë që autorizimi parlamentar të jepet ex-ante nga Kuvendi i Shqipërisë (neni 73 i Kushtetutës së Shqipërisë).

Zoti Berisha i denoncoi këto masa si antikushtetuese dhe refuzoi t'u bindej, pasi të veprosh ndryshe do të nënkuptonte dhënien e lejes për çdo gjyqtar apo prokuror për të shkruar një kushtetutë sipas urdhrave të qeverisë.

Për shkak të këtij qëndrimi, Prokurori Special i është drejtuar Kuvendit dhe ka kërkuar zëvendësimin e këtyre masave me masat e paraburgimit. Kërkesa nuk u mbështet me asnjë provë, siç parashikohet nga procedura dhe precedentët e përcaktuar, por në vend të kësaj, me vendime gjyqësore antikushtetuese. Duke sqaruar çdo dyshim se kush e drejtonte maskaradën, anëtarët e Partisë Socialiste (PS) të Komisionit Parlamentar të Rregullores, Mandateve dhe Imunitetit nuk hezituan të shfaqnin paragjykimin e tyre publikisht përpara se të merrnin vendimin.

Dhënia e autorizimit të kërkuar nga Kuvendi u bë në shkelje të procedurës së përcaktuar në Rregulloren Parlamentare. Në kundërshtim me Rregulloren dhe procedurën përkatëse që, parashikon që deputetit të prekur i jepet e drejta e fjalës dhe që raporti i Komisionit Parlamentar për Rregulloren, Mandatet dhe Imunitetin lexohet në seancë plenare, në mënyrë që deputetët të informohen për vendimin që do të marrin, asnjë nga kushtet për marrjen e një vendimi të vlefshëm nuk u plotësua. Gjatë seancës së Kuvendit, kryetarja e mazhorancës së Partisë Socialiste, futi mbi 50 policë të Gardës në sallën plenare dhe mori vendimin për miratimin e kërkesës së prokurorisë pa lexuar asnjë nga dy raportet e Komisionit të Mandateve dhe pa i dhënë mundësi Berishës të flasë pa praninë e forcave të Gardës në sallën e Kuvendit.

Pas vendimit të mazhorancës parlamentare të PS-së, prokurori i posaçëm, Arben Kraja, një nga oficerët e policisë sekrete të Enver Hoxhës, i shkarkuar nga detyra në vitin 1996 në përputhje me Ligjin e Lustracionit, dhe i cili e mban sërish detyrën në kundërshtim me ligjin e prokurorisë speciale që ndalon ish-oficerët e policisë sekrete të punojnë si prokurorë, si dhe prokurorja Enkeleda Millonai, e përfolur për lidhjet e saj me rrjetin kriminal të PS, i kërkuan gjykatës të vendosë ndaj Berishës masën e arrestit shtëpiak, nën mbikqyrje policie, dhe ndalimin e komunikimit me këdo përveç anëtarëve të familjes së tij të ngushtë.

GJKKO vrapoi të pranonte kërkesat e prokurorëve politikë, në shkelje të Kushtetutës dhe Kodit të Procedurës Penale (KPP).

Mbrojtja e zotit Berisha kërkuan që gjyqtarja e çështjes, Irena Gjoka, të përjashtohej nga çështja për anshmëri dhe shkelje të rëndë të përsëritur të ligjit. KPP-ja përcakton se pas një kërkese të tillë, procedura duhet të shtyhet deri në marrjen e vendimit mbi të. Në kundërshtim me ligjin, gjyqtarja Gjoka vazhdoi procedurën dhe pranoi kërkesën e prokurorëve pa u gjykuar kërkesa për përjashtimin e saj. Kujtojmë që Irena Gjoka ka qenë gjyqtare e shkarkuar në vitin 1996 nga KLD e drejtuar nga Sali Berisha, atehere president, dhe kërkesat e mëparshme të avokatëve për përjashtimin e saj nga çështja janë rrëzuar me komandë.

Këto masa kundër Z. Berisha u caktuan ndërkohë që ai çështë vetëm person nën hetim dhe ndaj tij nuk është ngritur asnjë akuzë pavarësisht hetimeve të vazhdueshme trevjeçare. Asnjë nga kriteret ligjore që kërkohen me ligj për caktimin apo përshkallëzimin e masave të kufizimit të lirisë nuk u plotësua në këtë rast. Nuk ka asnjë dispozitë në kodin penal material ose procedural të Republikës së Shqipërisë, që përcakton se liria e komunikimit të një personi mund të kufizohet në kushtet e arrestit të shtëpisë.

Për më tepër, liria e shprehjes dhe e organizimit politik janë liri themelore kushtetuese dhe si të tilla për zbatimin e tyre në rastin e deputetëve të kuvendit duhet të kërkohet autorizim i posacëm nga Kuvendi i Shqipërisë. Çdo vendim i marrë në kundërshtim me këtë procedure është i paligjshëm dhe si i tillë, i pavlefshëm.

Avokati i Sali Berishës, Sokol Mëngjesi në një dalje për mediat nga banesa e ish-kryeministrit të cilit iu komunikua masa e arrestit shtëpiak nga agjentët e BKH dhe sektorit të krimit ekonomik, tregoi sesi e priti kreu i Rithemelimit vendimin.

Shkurtimisht, Mëngjesi tha se Berisha e priste një gjë të tillë.  

Gazetarët: Si e priti Berisha komunikimin e masës së arrestit?

Mëngjesi: Normalisht një gjë e pritshme. U uroj festa të gëzuara. Mirupafshim!

Duke nisur nga ora 15:00 ish-kryeministri Sali Berisha është zyrtarisht në arrest shtëpie, masë e caktuar nga Gjykata e Posaçme për akuzat që rëndojnë ndaj tij për korrupsion pasiv sa i takon aferës së privatizimit të kompleksit ‘Partizani’

Gazetarja e Report Tv, Keti Banushi, raportoi se në banesën e Sali Berishës u paraqitën 2 oficerë të Byrosë Kombëtare të Hetimit dhe 2 oficerë të krimit ekonomik të cilët i komunikuan masën e arrestit shtëpiak. Ish-kryeministri i priti në banesë dhe komunikimi zgjati rreth 25 minuta.

Gjykata e Posaçme ka vendosur mesditën e sotme (30 dhjetor) pranimin e kërkesës së SPAK për ashpërsimin e masës së sigurisë  ndaj ish-kryeministrit Sali Berisha nga  “detyrim paraqitjeje” në “arrest në shtëpi”.

Ndërkohë në banesën e Berishës kanë mbërritur edhe oficerët që do t’i komunikojnë vendimin për ta izoluar në shtëpi.

Sipas vendimit të GJKKO-së, Sali Berisha do të mbikqyret nga shërbimet e policisë gjyqësore nga Drejtoria e Përgjithshme e Policisë së Shtetit.

Sali Berisha ndodhet në banesën e tij në rrugën Mustafa Matohiti ku do të presë dhe oficerët që do të ekzekutojë vendimin për ta izoluar në shtëpi.

Gazetarja e Report Tv Danjela Maloku raporton se poshtë banesës së tij nuk ka asnjë militant apo dhe deputetë mbështetës.

Ndërkohë deputeti I Rithemelimit njoftoi një konferencë për median në orën 14:30.

Drejtoria e krimit ekonomik i policisë së shtetit merr urdhrin e ekzekutimit per masen e Berishes. 

Ndërkohë menjëherë pas vendimit të GJKKO-së që i izolon të atin në shtëpi ka reaguar Shkëlzen Berisha.

“Kartolina e Rames per Vitin e Ri eshte arrestimi dhe izolimi i liderit te opozites!” shkruan ai në një postim në facebook ndërkohë

 Në ora 14:30, N/kryetari i PD, Luçiano Boçi ka njoftuar konferencë për median.

Në dalje të gjykatës Avokati Genc Gjokutaj e quajti të papranueshme mbikqyrjen policore si dhe ndalimin e tij për të komunikuar.
Për këtë Gjokutaj tha se gjykata duhet të merrte leje nga Kuvendi.

“Ky ishte vendimi sot. Ajo që ishte shqetësuese është se ky vendim vjen me ndalim komunikimi për një deputet. Duhet të ishte marrë autorizim i veçantë nga kjo gjykatë. Pritej se kjo gjykatë ka bërë dhe shkelje më të mëdha. Vendimi ishte i thatë; ndalimi i komunikimit, dhe lejimi vetëm me familjarët që bashkëjeton.”, tha ai.

Avokati i Sali Berishës, Genc Gjokutaj pas masës së arrestit për Sali Berishën u pyet nëse do ta zbatojë vendimin e gjykatës. Avokati la të kuptojë se Berisha do ta zbatojë masën e se ndodhet në banesë.

‘Kjo nuk është pyetje... do ta zbatojë apo jo, ai ndodhet në banesë. Tani bëni pyetje që është për të bërë. Do të ketë mbikëqyrje policore.’- tha avokati.

Avokatët kanë deklaruar se do të apelojnë vendimin.

Avokati i Berishës tha se kanë depozituar kërkesën përjashtimin e gjyqtares e kanë bërë dje me postë.

‘Kërkesën e bëmë dje me postë pasi ikte afati dhe ne s’kishim setin e provave, gjykata su shpreh fare me vendim ndërkohë që kërkesa është duke ardhur, në një panik për kërkesën për përjashtimin e saj ky ishte vendimi sot.’- tha Gjokutaj.

Report Tv dhe Shqiptarja.com siguron vendimin e zbardhur të Gjyqtares së GJKKO-së Irena Gjoka për Sali Berishën.

Vendimi

1. Urdhërohet shtetasi nën hetim Sali Berisha, të mos largohet nga banesa e tij e ndodhur në adresën: Rruga "Mustafa Matohiti", Ndërtesa 36, Hyrja l, Nd. 036, Njësia Administrative nr. 2, Tiranë si dhe të mos komunikojë me persona të tjerë përveç atyre që bashkëjetojnë në të njëjtën banesë me të.

3-Për ekzekutimin e këtij vendimi ngarkohet Prokuroria e Posaçme kundër Korrupsionit dhe Krimit të Organizuar, përfaqësuar nga prokurorët Arben Kraja dhe Enkeleda Millonai.

4- Mbikëqyrja e zbatimit të masës së sigurimit “arrest në shtëpi”, parashikuar nga neni 237 i K.Pr.Penale, si dhe urdhërimeve të përcaktuara në këtë vendim të kontrollohet nga Prokuroria e Posaçme kundër Korrupsionit dhe Krimit të Organizuar dhe shërbimet e policisë gjyqësore, pranë Drejtorisë së Përgjithshme të Policisë së Shtetit.

5- Kundër këtij mund të bëhet ankim nga palët, brenda pesë ditëve, në Gjykatën e Posaçme të Apelit për Korrupsionin dhe Krimin e Organizuar.

(Kliko këtu për të parë dokumentin e plotë)