Botërori 2026/ Tension, politikë dhe kujtime lufte pas ndeshjes! Angli - Argjentinë 'luhet' ende, Tuchel: S'kam asnjë pendesë! Scaloni: Sulmojmë kur ndiejmë aromën e gjakut (VIDEO)

Lautaro Martinez ishte heroi i Argjentinës në gjysmëfinalen ndaj Anglisë, duke realizuar golin e fitores në minutat shtesë dhe duke dërguar kampionët në fuqi në finalen e Kupës së Botës 2026, ku do të përballen me Spanjën.

"Ky është një emocion shumë i fortë, shumë i fortë për t'u duruar. Pasi shënova, mendova për herën e parë që babai më bleu një palë këpucë futbolli, që atëherë kam dashur ta shënoj këtë gol. Është një ëndërr e bërë realitet, një gëzim i pakufishëm. I thashë Medinës në stol: 'Tani do të hyj dhe do të shënoj'. Tani kemi një tjetër finale përpara. Është diçka magjike", tha ai.

Lautaro vërtet ka lumturi në sytë e tij. Një lumturi intensive dhe të thellë.

"Unë jam burrë dhe e shijoj jetën. E ëndërrova këtë moment, betohem. Enzo gjithashtu shënoi një gol fantastik dhe kjo skuadër vazhdon të vërtetojë vlerën e saj. Anglezët u lodhën gradualisht. Ata ushtruan presion për 60 minuta dhe ishin të rraskapitur. Pas golit, ata u qetësuan dhe kjo na dha më shumë qetësi shpirtërore. Ne e shpërndamë lojën dhe morëm kontrollin e saj", tregoi ai.

Pas fitores 1-2 ndaj Anglisë në Kupën e Botës 2026, lojtarët e Argjentinës shfaqën një banderolë në lidhje me territorin e diskutueshëm të Mbretërisë së Bashkuar, të njohur si Ishujt Falkland.

Argjentina rrezikon mundësinë e masave disiplinore pas fitores së saj në gjysmëfinale ndaj Anglisë, pasi lojtarët e saj mbajtën një banderolë që mbështeste pretendimin e vendit të tyre për Ishujt Falkland. Por vendimi për të hapur një banderolë me shkrimin “Las Malvinas son Argentinas” (Malvinas janë argjentinase) mund të çojë në një gjobë nga organi qeverisës i futbollit, FIFA.

Në vitin 2014, Federata Argjentinase e Futbollit u gjobit me 30,000 franga zvicerane (32,455 euro) kur lojtarët pozuan për foto para një banderole me të njëjtin mesazh në përgatitje të një ndeshjeje kundër Sllovenisë. Sipas Kodit të Sjelljes së Stadiumit të FIFA-s, të publikuar para fillimit të turneut, "banderolat, flamujt, fletushkat, veshjet dhe sendet e tjera që janë me natyrë politike, ofenduese dhe/ose diskriminuese" janë të ndaluara.

Zëvendëspresidentja e Argjentinës, Victoria Villarruel, shkroi: "Ata ndaluan mbajtjen e tyre (banderolave) në stadium dhe harruan se ne i mbajmë në gjak dhe në zemrat tona".

Ishujt Falkland ishin në qendër të një lufte midis Mbretërisë së Bashkuar dhe Argjentinës në vitin 1982, në të cilën u vranë 655 ushtarë argjentinas dhe 255 ushtarë britanikë.

Argjentina prej kohësh ka pretenduar sovranitet mbi Ishujt Falkland, të cilët i quan Ishujt Malvina, duke argumentuar se arkipelagu i Atlantikut Jugor u pushtua në mënyrë të paligjshme nga Britania në vitin 1833.

Mbretëria e Bashkuar e hedh poshtë pretendimin, duke pohuar se ka sovranitet mbi ishujt dhe se banorët e ishullit votuan me shumicë dërrmuese në një referendum të vitit 2013 për të mbetur një Territor Britanik Jashtë Detit.

OKB-ja nuk e mbështet pretendimin e sovranitetit të asnjërit vend, por u ka bërë thirrje vazhdimisht të dy qeverive të rifillojnë negociatat për të arritur një zgjidhje paqësore.

Pas fitores 1-2 kundër Anglisë dhe arritjes në finalen e Kupës së Botës 2026, kapiteni i Argjentinës, Lionel Messi foli për rivalin e fundit, Spanjën. 'Pleshti' tha se i njeh lojtarët e Spanjës pasi disa prej tyre luajnë për Barcelonën, ish-klubin e tij. Për Messin finalja do të jetë e barabartë dhe do ndahet me rezultat të ngushtë.

"E njoh mirë skuadrën spanjolle dhe ata kanë një stil loje që e kanë zhvilluar gjatë shumë viteve. I njoh edhe lojtarët. Kam luajtur kundër shumë prej tyre dhe i ndjek nga afër. Disa nga lojtarët luajnë për Barçën, një klub që do të thotë shumë për mua dhe me të cilin ende vazhdoj të kem lidhje. Do të jetë një finale e veçantë e Kupës së Botës dhe natyrisht, pres që të jetë shumë e ngushtë.

Çdo gjë që kam përjetuar me këtë grup që kur u riktheva për Kupën e Amerikës 2019 ka qenë e pabesueshme, përtej çdo gjëje që mund ta kisha imagjinuar. Kam shijuar çdo minutë të tij dhe jo vetëm sukseset dhe trofetë që kemi fituar. Të ndash jetën e përditshme me ta dhe të garosh përkrah tyre... ka qenë një udhëtim vërtet i mrekullueshëm dhe gjithashtu u kemi sjellë tifozëve shumë gëzim. Jam shumë i lumtur.

Mendoj se treguam përsëri atë që kemi bërë prej vitesh. Ky ekip luan futboll të lirë dhe me cilësi të lartë. Jemi të duruar dhe dimë si t'i lexojmë momentet kyçe në një ndeshje. Mendoj se e diktuam ndeshjen që nga fillimi. Edhe pse nuk krijuam raste të qarta para pjesës së parë, e kishim kontrollin dhe mbajtëm shumë topin. Dhe pasi ata shënuan, ishim edhe më të mirë", tha Messi.

Eliminimi i 'Tre Luanëve' në gjysmëfinalen e Kupës së Botës nga Argjentina, e ka ndarë shtypin britanik. Një pjesë e mirë e medieve ka shprehur zemërim të thellë për banderolën e Ishujve Falkland.

Një pjesë tjetër e gazetave dhe portaleve britanike është marrë me trajnerin Thomas Tuchel, duke e akuzuar ashpër për taktikën shumë mbrojtëse që zgjodhi pasi Anglia kaloi në avantazh me Gordon.

Shumë tituj të shtypit anglez ishin një sulm ndaj rivalëve, me banderolën “Malvinas janë argjentinase” në vend të fotos kryesore. Po ashtu, të pashmangshme nga shtypi britanik akuzat ndaj trajnerit gjerman Tuchel, i kritikuar hapur edhe nga specialistët e futbollit.

Anglia po kontrollonte lojën dhe pasi shënoi u tërhoq në mënyrë të pakuptimtë në zonën e saj, duke ia lënë gjithë fushën Argjentinës, që përfitoi dhe realizoi dy gola.

Portieri i Anglisë, Jordan Pickford, ishte i përgatitur për gjuajtjet me penallti kundër Argjentinës, por kur lojtarët rivalë i gjetën shënimet e tij ishte tepër vonë pas anglezët u përmbysën 1-2.

Momenti kur lojtarët e Argjentinës me Lionel Messin në krye kanë gjetur shënimet e Pickford është bërë viral në internet. Portieri i Anglisë kishte studiuar goditjet e penalltive të rivalëve, duke i shënuar në shishen e tij të ujit, siç bëjnë zakonisht portierët.

Mirëpo këto të dhëna nuk i hynë në punë Pickford pasi Anglia e tij humbi 1-2 brenda 90 minutave. Interesant është reagimi i futbollistëve të Argjentinës që kanë zbuluar 'armën sekrete' të rivalëve, paçka se gjithçka kishte përfunduar.

Kamerat kapën momentin kur Nico Gonzalez, Lionel Messi dhe mbrojtësi Marcos Senesi po e shikonin me kureshtje shishen, ndërsa një pjesë e bisedës së tyre u bë virale nga leximi i buzëve. 

“Shikoni çfarë gjeta. Ka shënime për Lautaron, Julianin…”, thotë Nico González.

“Po, janë të gjithë lojtarët aty”, iu përgjigj një anëtar i stafit teknik.

Messi, i habitur, pyeti: “Çfarë? Po çfarë nënkuptojnë këto shënime?”

Stafi i kërkoi Marcos Senesit, i cili flet anglisht, t’ua përkthente.

“Aty shkruan se në cilën anë duhet të hidhet portieri”, shpjegon  Senesi.

“Për portierin Pickford?”, pyeti Messi.

“Po. Për ty, Leo, shkruan: ‘Shtiru sikur do të hidhesh majtas, por hidhu djathtas’”, iu përgjigj Senesi.

Messi reagoi me buzëqeshje: “Paska studiuar me shumë kujdes mënyrën se si i gjuaj penalltitë”.

Jude Bellingham nuk i ka mbajtur dot nervat pas humbjes së Anglisë kundër Argjentinës. Mesfushori ka parë rivalët të festojnë përpara syve të tij dhe ka goditur me shpullë në kokë një prej rivalëve, pikërisht Valentin Barco.

Kaq ka mjaftuar që për disa çaste gjakrat në fushë të ndizeshin dhe futbollistët nga dy kampet të kishin shtyrje mes tyre.

Fitorja 1-2 me përmbysje kundër Anglisë ka bërë që tifozët e Argjentinës të jenë në festë të madhe. Kulmi ishte në kryeqytetin e Argjentinës, Buenos Aires. Mijëra tifozë e ndoqën përballjen në rrugët dhe sheshet e qytetit ndërsa pas përballjes festa ishte legjitime.

Atmosfera u elektrizua nga këngët tradicionale të tifozëve, si “Muchachos”, “Olé, olé, olé, Messi, Messi” dhe “Kush nuk kërcen është anglez”, ndërsa himni i ri i këtij Botërori, “La cuarta estrella” (“Ylli i katërt”), u këndua në kor nga turma. Boritë e makinave dhe fishekzjarrët shoqëruan festimet deri në orët e vona të natës.

Festë kishte edhe në qytetete e tjera të Argjentinës dhe në shtetet ku komuniteti argjentinas është i madh.