Çështja ‘McGonigal’, flasin ish kolegët e ish-zyrtarit të FBI: Akuzat janë të tmerrshme, u bë thjesht i pangopur! Byroja ‘në siklet absolut’

Çështja ‘McGonigal’, flasin ish kolegët e ish-zyrtarit të FBI: Akuzat janë të tmerrshme, u bë thjesht i pangopur! Byroja ‘në siklet absolut’

Charles McGonigal

Bota e izoluar e agjentëve të kundërzbulimit të FBI-së u trondit muajin e kaluar kur një prej tyre, Charles F. McGonigal, dikur zyrtari më i lartë i kundërzbulimit të FBI-së në Nju Jork, u akuzua për shitjen e aksesit tek zyrtarët rusë dhe shqiptarë në këmbim të qindra mijërave dollarëve cash.

Pasi u tërhoq nga FBI në vitin 2018, McGonigal është akuzuar zyrtarisht se ka punuar në mënyrë të paligjshme për një nga oligarkët më famëkeq të Rusisë, Oleg Deripaska, të cili i kishte dalë emri si i lidhur me hetimin e FBI-së për Rusinë falë lidhjeve të tij me ish-menaxherin e fushatës së Donald Trump, Paul Manafort.

Ish-zyrtarët e Byrosë Federale të Hetimit (FBI) që punuan me McGonigal kanë folur për CNN dhe janë shprehur të habitur, të zhgënjyer dhe “të mërzitur” kur mësuan lajmin. Njëri i quajti akuzat “të tmerrshme”.

“Ky djalosh ishte jashtëzakonisht i respektuar dhe shihej vërtet si një ekspert në karrierë i kundërzbulimit,” tha një ish-zyrtar i lartë të FBI-së që punonte me McGonigal.

“Ai ishte një ‘super star’ në kundërzbulim, i cili, kur dilnin punë të vështira, kur dilnin detyra shumë të ndjeshme, ai ishte në listën e vogël të njerëzve që do t’i shikoje dhe do të thoshe, ‘Hej, ku është Charlie, çfarë po bën ai për gjashtë muajt e ardhshëm?’

Spekulimet janë përqendruar rreth dëmit të mundshëm që mund të ketë shkaktuar McGonigal, duke përfshirë nëse ai ekspozoi ndonjë informacion të ndjeshëm që mund të dëmtojë sigurinë kombëtare të SHBA. Si një zyrtar i lartë i kundërzbulimit, McGonigal kishte akses në disa nga informacionet më të ndjeshme që zotëronte FBI-ja. Gjithashtu ai kishte informacione të dala nga CIA dhe agjenci të tjera.

Ai ishte konfidencial edhe për teknikat e grumbullimit të informacionit të FBI-së, operacionet kundër diplomatëve rusë në SHBA dhe më shumë, thonë ish-zyrtarë që e kanë njohur punën e tij.

Ka gjithashtu pyetje mbi afërsinë e McGonigal, me disa hetime të profilit të lartë, duke përfshirë ato që përfshijnë Hillary Clinton dhe bashkëpunëtorët e Donald Trump. McGonigal ndihmoi në mbikëqyrjen të pjesëve të caktuara të të dy hetimeve. E gjithë kjo ngjalli një interes të fortë për McGonigal, përfshirë së fundmi edhe Kongresin.

Senatori Dick Durbin nga Illinois, demokrati më i lartë në Komitetin Gjyqësor të Senatit, po kërkon një informim mbi “shkallën e vërtetë në të cilën sjellja e pahijshme e supozuar e z. McGonigal mund të ketë ndikuar në këto çështje shumë të ndjeshme, duke përfshirë nëse ai ka kompromentuar burime, metoda të ndjeshme dhe analiza” dhe “nëse sjellja e tij e supozuar e pahijshme ndikoi materialisht në rezultatin e ndonjë hetimi apo kompromentoi më tej sigurinë tonë kombëtare”.

Republikanët e Dhomës së Përfaqësuesve thanë të enjten se kanë nisur hetimet e tyre. Peter Lapp, një ish-agjent i kundërzbulimit të FBI-së, i cili dikur ka punuar për McGonigal, i tha CNN se rasti McGonigal është “një siklet absolut” për FBI-në.

FBI sheh rast korrupsioni jo spiunazh

Burime të informuara për këtë çështje i thonë CNN se, të paktën tani për tani, zyrtarët e FBI-së e shohin McGonigal jo si një spiun, por më shumë si një ish-zyrtar të korruptuar që kërkon të fitojë para teksa linte detyrën. Zyrtarët e lartë të FBI-së e hedhin poshtë idenë “e arrestimit të McGonigal si një siklet”, në vend të kësaj e shpallin atë si një shenjë se byroja është e gatshme të ndjekë të vetët që akuzohen për shkelje të ligjit.

Drejtori i FBI-së, Christopher Wray, mandati i të cilit filloi pak para daljes në pension të McGonigal, u pyet në lidhje me rastin në një konferencë shtypi javën e kaluar.

“Ka disa gjëra të rëndësishme që po humbasin këtu në lidhje me atë rast,” tha Wray.

“Është FBI-ja që e nisi këtë hetim, është FBI dhe agjentët tanë që me kujdes dhe metodikë e bashkuan çështjen kundër tij dhe është FBI-ja që e arrestoi… Mendoj se akuzat në atë rast tregojnë se është gatishmëria e FBI-së si një organizatë për të hedhur dritë mbi sjelljen që është krejtësisht e papranueshme, përfshirë kur ndodh nga një prej njerëzve tanë, dhe për t’i mbajtur ata njerëz përgjegjës.”

Pas kryerjes së vlerësimeve të dëmit të mundshëm të shkaktuar ndaj informacionit të inteligjencës, si dhe burimeve dhe metodave që zotëronte McGonigal, FBI arriti ta konsideronte atë si një rast të thjeshtë korrupsioni, sipas njerëzve të informuar për këtë çështje.

Byroja nuk e sheh McGonigal si një rast spiunazhi në stilin e Robert Hanssen, spiunit më të dëmshëm në historinë e FBI-së. Hanssen spiunoi për Rusinë për vite me radhë ndërsa mbante pozicione të nivelit të lartë të kundërzbulimit, duke bërë goditje vdekjeprurëse për t’i dhënë Rusisë informacione që ndihmuan në identifikimin e spiunëve amerikanë dhe teknikave të spiunazhit.

Nuk ka asnjë sugjerim në aktakuzën publike se McGonigal ka kryer spiunazh. Zyrtarët aktualë dhe ish-zyrtarë të FBI-së të njohur me McGonigal dhe punën e tij thonë se ata besojnë se McGonigal – një ish-kontabilist – thjesht u bë “i pangopur”.

Ish-zyrtarët hedhin poshtë gjithashtu serinë e teorive që janë përhapur në mediat sociale për rolin e McGonigal në hetimin e FBI-së për Rusinë, veçanërisht ato që lidhen me punën e tij për Deripaska.

McGonigal drejtoi seksionin kibernetik të divizionit të kundërzbulimit të FBI-së në vitin 2016, kur byroja po gjurmonte nga afër përpjekjet e inteligjencës ruse për të ndikuar në zgjedhjet presidenciale. Por ish-zyrtarët thonë se McGonigal nuk kishte autoritetin përfundimtar të vendimmarrjes në hetimin më të gjerë, i cili përfundimisht përfshinte shumë përtej aktiviteteve kibernetike të Rusisë.

Një kontakt shqiptar

McGonigal u promovua për të trajtuar disa nga rastet më të ndjeshme të kundërzbulimit në dosjet e FBI-së, duke përfshirë një hetim për vrasjen ose zhdukjen e disa aseteve (agjentë) të CIA-s në Kinë. Ai shihej si kompetent, tepër inteligjent dhe punëtor. Por në vitin 2017 pati një zhvillim të rëndësishëm. Ishte saktësisht një vit pasi ishte emëruar kreu i divizionit të kundërzbulimit të FBI-së në Nju Jork dhe McGonigal dyshohet se u ul në një makinë të parkuar jashtë një restoranti në qytet dhe pranoi 80,000 dollarë cash nga një person që kishte punuar më parë me Inteligjencën shqiptare (në kohën e komunizmit).

Është një nga detajet më të çuditshme nga dy paditë kundër McGonigal, të ngritura muajin e kaluar në Nju Jork dhe Uashington, që përfshijnë akuza për pastrim parash, komplot për të shkelur sanksionet e SHBA kundër një oligarku rus dhe gënjeshtra ndaj FBI-së.

Për gati dy vjet përpara daljes në pension të tij në 2018, Departamenti i Drejtësisë pretendon se McGonigal ua shiti në mënyrë efektive aksesin e tij zyrtarëve të lartë amerikanë, duke u përpjekur të ndërmjetësonte takime për individë nga Bosnja dhe Hercegovina në emër të personit të lidhur më parë me inteligjencën shqiptare.

McGonigal dyshohet se pranoi të paktën 225,000 dollarë për të ndihmuar, duke gënjyer FBI-në për aktivitetet e tij, duke përfshirë udhëtimet e shumta në Evropë të paguara nga kontaktet e tij shqiptare dhe të marra pa informuar FBI-në, si dhe një marrëdhënie të fshehtë që ai mbante me Kryeministrin e Shqipërisë.

Pasi doli në pension në vitin 2018, sipas padisë së Nju Jorkut, McGonigal shkeli sanksionet e SHBA-së duke marrë pagesa të paligjshme për të ndihmuar Deripaskën në përpjekjen për të hequr sanksionet e SHBA kundër tij dhe për të hetuar një rival politik në Rusi.

Për disa zyrtarë aktualë dhe ish-zyrtarë, sjellja e McGonigal ndërsa ai ishte ende duke punuar në byro është shumë më “e tmerrshme”, siç tha ish-zyrtari i lartë, sesa akuzat kundër tij në lidhje me Deripaskën që u zhvilluan pasi ai kishte dalë në pension.

Veçanërisht shqetësues, tha ky person, është pretendimi se McGonigal bëri që FBI të hapte një hetim penal për një shtetas amerikan, në të cilin personi i lidhur më parë me inteligjencën shqiptare pritej të vepronte si një burim njerëzor – por nuk arriti të zbulonte marrëdhënien e tij financiare me atë person në byro.

“Kjo është tepër serioze, padyshim e gabuar – nëse ai ka bërë këto gjëra që ata pretendojnë, nuk është si një zonë gri”, tha ish-zyrtari i lartë i FBI-së.

Blice të një temperamenti

Ene nuk është e qartë saktësisht se çfarë e informoi FBI-në se një nga agjentët e saj të kundërzbulimit mund të ketë kaluar kufirin. Sipas njerëzve që kanë dijeni për ështjen, në prapaskenë FBI ka hetuar McGonigal për vite, duke përfshirë vëzhgimin e tij për muaj të tërë.

Disa që kanë punuar ngushtë me McGonigal thonë se në atë kohë nuk mendohet se mund të kishte diçka nuk shkonte. Peter Lapp, i cili punoi për McGonigal në një rast spiunazhi të lidhur me Kinën dhe më pas u pushua nga puna prej tij, kujtoi për CNN se McGonigal kishte një temperament të vështirë dhe “u bërtiste” vartësve shpesh.

“Ai të bërtiste aq shumë sa të bënte për 'ujë të ftohtë''”, tha Lapp.

I pyetur nëse ai kishte ndonjë arsye për të dyshuar sjelljen e McGonigal, Lapp ishte i paqartë: “Edhe në do të kthehesha në retrospektivë, jo. Vetëm sepse je një shef budalla, nuk do të thotë se do të jesh i korruptuar”. Një tjetër ish-zyrtar i lartë ishte po aq i hapur kur u pyet nëse ata kishin ndonjëherë dyshime se McGonigal ishte i korruptuar. “Absolutisht asnjë, kurrë.”/ Përktheu nga CNN Shqiptarja.com

K.T./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Mendoni se komisionet hetimore për Shëndetësinë e TIMS do kenë rezultat?



×

Lajmi i fundit

SPAK firmos 9 masa sigurie, mes tyre 2 ish-zyrtarë të Bashkisë së Tiranës

SPAK firmos 9 masa sigurie, mes tyre 2 ish-zyrtarë të Bashkisë së Tiranës