Përballë mureve të Qytetit të Vjetër të Jeruzalemit, mes flamujve dhe kamerave, një dhuratë simbolike mori vëmendjen në ceremoninë e hapjes së Dhomës së Tregtisë Izrael–Shqipëri gjatë kësaj jave. 

Guvernatori i Binyaminit dhe kreu i Këshillit Yesha, Yisrael Ganz, i dhuroi kryeministrit Edi Rama një vepër arti të veçantë, të bazuar në një nga krijimet e njohura artistike të vetë Ramës, e ndërthurur me simbolin e fisit të Beniaminit, ujkun. Rama mori gjithashtu si dhuratë edhe një spilë me simbolin e ujkut të Binyaminit.

Ceremonia u ndoq nga figura të larta të shtetit izraelit, mes tyre kryetari i Knessetit Amir Ohana, ministrja e Transportit Miri Regev, ministri i Ekonomisë Eli Cohen, ministrja e Mjedisit Idit Silman, ministri i Trashëgimisë Amichai Eliyahu, deputeti Ariel Busso, si dhe përfaqësues të rëndësishëm të diplomacisë dhe ekonomisë izraelite.

Sipas mediave izraelite, kryeministri Rama u shfaq i prekur nga dhurata dhe falënderoi publikisht Ganz. Në fjalën e tij, ai theksoi lidhjen e hershme mes Shqipërisë dhe popullit hebre.

“Ne kemi një marrëdhënie të ngushtë me popullin hebre, nga Mesjeta, përmes shpëtimit të hebrenjve gjatë Holokaustit, e deri më sot,” tha Rama. Ai shtoi se Shqipëria është i vetmi vend në Europë që aktualisht po hap institucione të reja hebraike, duke shtuar me humor: “E dua Izraelin aq shumë sa ndoshta, me kalimin e brezave, mund të kem pasur edhe gjak hebre.”

Kryeministri shqiptar bëri thirrje për forcimin e bashkëpunimit ekonomik dhe për heqjen e barrierave burokratike.

“Duhet ta thellojmë bashkëpunimin ekonomik. Pres me padurim të vazhdojmë punën tonë të përbashkët,” tha Rama, siç citohet nga mediat vendase.

Në fjalën e tij, Yisrael Ganz e lidhi dhuratën me simbolikën biblike, vlerat dhe politikën.

“Simboli i Binyaminit është ujku dhe, siç e dimë, ujqit jetojnë në tufa. Ne jemi krenarë të jemi miqtë tuaj, miq të Shqipërisë – një tufë force dhe fuqie.”

Ganz theksoi se lidhjet ekonomike dhe bashkëpunimi ndërkombëtar janë një interes strategjik për Izraelin dhe për rajonin e Binyaminit, duke nënvizuar se zhvillimi ekonomik dhe partneritetet janë çelësi i stabilitetit dhe prosperitetit në Jude dhe Samari, si dhe në të gjithë rajonin.

Mediat izraelite e vlerësojnë bashkëpunimin me Shqipërinë, një vend europian me shumicë muslimane, si një hap me potencial të gjerë diplomatik dhe ekonomik për Izraelin, për Binyaminin dhe për rajonin.