Mëngjesi i kësaj të marte në Lushnjë ishte i zymtë. Era e rëndë e tymit ndihet ende në gjithë zonën pranë stadiumit, edhe pse flakët janë shuar.

Zjarri i rënë pas mesnate ka shkrumbuar tregun e fruta-perimeve, ku ushtrojnë aktivitetin rreth 50 tregtarë. Të paktën 25 prej tyre raportojnë dëme të mëdha.

Me lot në sy, tregtarët tregojnë se kanë humbur gjithçka dhe e kanë të vështirë të nisin nga e para pa ndihmën e bashkisë.

“Dëm është bërë shumë. Do të na vlerësojë bashkia apo jo?! Gjithë ai mall, gati 2 milionë lekë brenda.”

“Dëm më shumë s’ka ku të shkojë. Gjithçka u dogj, ne me ato ushqehemi.”

Zjarri ka rënë rreth orës 03:30 në pjesën fundore. Zjarrfikëset ndërhynë në kohë, duke shpëtuar gjysmën e tregut.

I ndërtuar 3 vite më parë, tregu menaxhohet nga bashkia dhe ka roje e kamera sigurie, por ato nuk kanë regjistruar momentin e rënies së zjarrit.

Tregtarët paguanin rreth 3,500 lekë qira mujore, por mallrat nuk ishin të siguruara. Megjithatë, ata kërkojnë dëmshpërblim.

“Duam ndihmë nga shteti për dëmet.”

Kryetarja e Bashkisë tha se është ngritur grupi i punës për vlerësimin e dëmeve.

“Nga ana e bashkisë po ngrihen grupet e vlerësimit të mallit dhe, derisa objekti të vihet sërish në funksion, do të gjendet një zgjidhje për sistemimin e tregtarëve në këtë zonë”, tha Eriselda Sefa.

Edhe deputeti demokrat Saimir Korreshi ka kërkuar zbardhjen e shkaqeve të zjarrit dhe dëmshpërblimin e tregtarëve.

“U bëjmë thirrje autoriteteve të zbulojnë shkaqet e zjarrit, dëmshpërblimin e tregtarëve, rikthimin e strukturës në gjendjen e mëparshme me një rikonceptim tjetër, pasi aty është efekt serë gjatë verës dhe shi e të ftohtë që hyn gjatë dimrit.”

Shkaqet e zjarrit mbeten ende të paqarta, ndërsa paraprakisht dyshohet për një zjarr aksidental, i shkaktuar nga ndonjë shkëndijë tek ndriçuesit apo pajisjet e tjera elektrike të tregut.

Rendit zhvillimet sipas orarit:
Ora 10:12
Djegia e tregut të fruta-perimeve në Lushnjë, reagon Korreshi: Të zbulohen shkaqet e zjarrit, dëmshpërblim për tregtarët

 

Deputeti Saimir Korreshi ka reaguar për djegien e tregut të fruta-perimeve në Lushnjë duke bërë thirrje zbulimin e shkaqeve të zjarrit dhe dëmshpërblimin e tregtarëve. Sipas tij, për këtë treg ka pasur protesta që në fillim për shkak të materialeve të përdorura dhe ndërtimit të tij.

“Djegia e tregut të fruta-perimeve në Lushnjë. U bëjmë thirrje autoriteteve të zbulojnë shkaqet e zjarrit, dëmshpërblimin e tregtarëve që paguajnë taksat për ushtrimin e aktivitetit. Rikthimin e strukturës në gjendjen e mëparshme me një rikonceptim tjetër, pasi aty është efekt serë gjatë verës dhe shi e ftohtë që hyn gjatë dimrit, për të cilën tregtarët janë ankuar që në inaugurimin e tij”, shkruan Korreshi krah videos.

Në video, ai thotë se sipas informacioneve mund të ketë qenë një shkëndijë nga një peshore ose karikues.

“Shërbimi zjarrfikës e ka fikur në kohë sepse dëmet do të ishin kolosale”, shprehet Korreshi.

 

P.J/Shqiptarja.com

K.B/A.M/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 19 Maj, 10:36

    Sylvinho e mbyll me Kombëtaren, si e vlerësoni punën e trajnerit brazilian?

Lajme të tjera