Donacionet zvicerane për ‘Shkencat
e Natyrës’,Prokuroria pushon hetimet

Pas kronikës së Report Tv se Universiteti i Tiranës dhe Fakulteti i Shkencave të Natyrës, ishin përfshirë në një skandal me pajisje dhe materiale universitare të dhuruara nga Universiteti i Zyrihut në vitin 2014, duket se situata ka marrë zgjidhje.

Prokuroria pranë Gjykatës së Shkallës së Parë Tiranë, pas 2 vjetësh hetim, ka vendosur ta pushojë çështjen për mungesë të veprës penale dhe që pajisjet t’i kalojnë në pronësi Sokol Abazit, ish-profesor në Fakultetin e Shkencave Natyrore.

Në një intervistë për Report Tv, Abazi tregon se ka paguar detyrimet doganore për mallin në vlerën e 300 eurove, pasi ato u refuzuan nga  ish Dekani i Fakultetit ‘’Mynyr Koni’’, sot rektor i Universitetit të Tiranës, gjë që është pohuar edhe nga profesori zviceran Reinhard Bachofen.

“Në vitin 2012 kur Mynyr Koni u bë dekan i këtij universiteti në mënyrë kategorike refuzoi që t’i pranonte, i jemi lutur disa herë dhe më së fundmi e realizuam transportin që të bëhej nga Universiteti i Zyrihut duke m’i dhënë mua personalisht dhe kam paguar me shpenzimet e mia të gjitha detyrimet doganore pasi Universiteti refuzoi t’i pranonte”, u shpeh Abazi.

Abazi shprehet se pushimi i tij nga puna si profesor në Fakultetin e Shkencave Natyrore dhe kallëzimi ‘’vjedhje duke shpërdoruar detyrën’’ ka ardhur për motive personale nga rektori Koni.

Altin Mele, profesor në Fakultetin e Shkencave Natyrore tha për Report Tv se pajisjet i shërbenin kërkimit shkencor dhe punës me studentët, por prej 2 vitesh qëndronin të papërdorura në 2 dhoma të fakultetit.

“Janë gjëra të cilat nuk i përdorim dot me buxhetet modeste që ka në dispozicion Fakulteti i Shkencave”, u shpreh Mele.
  
Po ku do të dërgohen këto pajisje pas tërheqjes së tyre nga ambientet e Shkencave Natyrore?

“Për momentin ato pajisje do të depozitohen diku, por një pjesë do t'ia ofroj Institutit kandez që t’i përdorë pasi gjithmonë e kamë bërë këtë”, tha Abazi ndër të tjera.

Pavarësisht vendimit të pushimit të çështjes nga Prokuroria dhe të lënë në fuqi nga shkalla e parë e Gjykatës së Tiranës, Rektorati ka bërë sërish ankim, duke kërkuar nga gjykata që ky rast të hetohet i plotë. 

Redaksia Online
Al.N/Shqiptarja.com

TAG:
• mynyr koni