Aktori Donald Veshaj, ka folur për herë të parë pas përfundimit të 'Big Brother Vip'. Përmes rrjeteve sociale Donaldi i ka shprehur falenderimet atyre që e kanë mbështetur dhe votuar edhe pse nuk fitoi përballë Ilir Shaqirit.

“Jam munduar që të nxjerr një video për të falenderuar të gjithë njerëzit që më kanë mbështetur realisht. Nuk e di se si mund ti falenderoj të gjithë ata njerëz që më kanë mbështetur. Kanë qenë shumë. Nuk di se si t’jua shpreh mirënjohjen, është ndjenjë fantastike, nuk e kam përjetuar asnjëherë ndjesinë e mbështetjes së njerëzve duke më mbështetur në këtë mënyrë duke shpenzuar lekët e tyre, eurot e tyre për të më dhënë mua një fitore që nuk e mora. Gjithsesi ju përshëndes pafund dhe ju dua shumë.”-thotë Donaldi.

Në falënderim të atyre që e përkrahën, do të ndërtojë 4 shtëpi, dy në Shqipëri e dy në Kosovë për njerëzit në nevojë. Një thirrje Donaldi e ka edhe për fituesin e ‘Big Brother’, Ilir Shaqirin që t’i bashkohet kësaj nisme.

“Do shihemi se e kam një telefon në dorë dhe do kemi video të tjera. E kam zemrën mal. Doja të shtoja që vërtet nuk e fitova çmimin e madh, por kam vendosur që ato 100 mijë euro ti shtoj nga vetja ime për të ndërtuar 4 shtëpi për njerëzit në nevojë, 2 shtëpi në Kosovë dhe 2 shtëpi në Shqipëri. 100 mijë euro që do ti vendos nga vetja ime se është më e pakta që mund të bëj për njerëzit që më kanë përkrahur. Patjetër që do kisha dëshirë që të ftoja dhe fituesin që të më bashkohej në këtë nismë për këtë komb që na ka mbështetur. Unë do ta bëj, kështu që nëse dhe ti do, mund ta bësh me mua.”-shprehet Donaldi.