Dosja/ ‘T'u çojmë shtetin’, përplasja me grupin e ‘Doqes’, ja si e planifikoi Inez Hajrulla eliminimin e Gentian Qarrit! Policët u jepnin informacione për rivalët

Report Tv ka siguruar dosjen hetimore të Prokurorisë së Posaçme në ngarkim të një prej grupeve më famëkeqe të Vlorës, atë të drejtuar nga Inez Hajrulla. SPAK ka arritur të zbardhë 2 atentate të ndodhura 5 vite më parë, atë të Gentjan Qarrit dhe Bledar Birçajt, me porositës Inez Hajrullës dhe krahun e tij të djathtë Ervis Matodashaj.

Nga operacioni i zhvilluar nga SPAK në mars të këtij viti, në pranga ra vetëm Rezart Kuçi, i përfshirë në trafikun e kokainës e gjithashtu i jepte informacione grupit Hajrulla mbi lëvizjet e autoriteteve policore. Askush prej grupit nuk u arrestua, as vetë Hajrulla. Masat e vetme të ekzekutuara është ajo e Flodian Plaku, i cili ndodhej në burg për një tjetër çështje penale dhe Hamëz Demushi i kapur në Zvicër.

Gentian Qarri u vra si pasojë e rivalitetit të Hajrullës me Fatmir Hysenin i njohur me nofkën ‘Doqja’. Qarri ishte ‘ushtari’ i Hysenit, i cili ishte i pamundur për tu arritur nga Hajrulla. Ky i fundit kishte vazhdimisht informacione se Fatmir Hyseni po përgatitej për ta goditur dhe në pamundësi për ta ekzekutuar drejpërdrejt, vendosën t’i prisnin krahët përpara se ai t’i sulmonte dhe në shënjestër u vu Gentian Qarri. Në bisedat e zbardhura nga SkyEcc, Hajrulla planifikon dhe dërgimin e policisë në 'folenë' ku qëndrojnë rivalët e tij, 'Tu çojmë shtetin'.

Dosja hetimore, zbardh edhe gjurmimin e kundërshtarëve përmes GPS që vendosin në makina, për të ndjekur lëvizjet dhe kryer ekzekutime. Informacioni që vinte nga grupi rival, Inez Hajrullës nuk i vinte rastësisht, por dyshohet se kishte një kontakt që e informonte për gjithçka, madje edhe për planin që ta hiqnin qafe atë dhe bashkëpunëtorin e tij Ervis Matodashajn.

SPAK thotë se këta dy të fundit, pra Hajrulla dhe Matodashaj, komunikonin me grupin që vranë Gentian Qarrin me porosi të tyre përmes radios. Faktet janë evidentuar pas kryerjes së ekzekutimit, ku dyshja në fjalë interesohet për çdo detaj gjatë bisedave në SKY ECC.

18 gëzhoja u gjetën në vendin ku u vra Gentian Qarri. Makina që përdorën autorët dhe që e dogjën ishte një “Toyota Auris” e vjedhur në Greqi. SPAK identifikoi vetëm Ervis Matodashajn dhe Inez Hajrullën si porositës, financues dhe koordinues të veprimeve më datë 06.02.2021, ku është qëlluar me armë zjarri ndaj shtetasit Gentjan Qarri. Ekzekutorët ende nuk dihet se kush janë.

Pjesë e grupit kriminal ishte dhe polici Rezart Kuçi. Faktet flasin se ishte vënë në shërbim të grupit të Vlorës, ku jepte informacione që u nevojiteshin. Në një episod, ai shfaqet duke biseduar me Flodian Plakun, 5 vite para se të arrestohej në gusht të 2025, në Orikum, si pjesëmarrës në ekzekutimin e Gentian Bejtjas në Fush-Krujë. Plaku kërkon informacione nga Kuçi për prezencë policie në banesën e tij në Vlorë, dhe pasi interesohet, kuptohet që është për një çështje të autoriteteve italiane, që i kishin dhënë lirinë po atë ditë, por që shihet shqetësimi i palëve mos është zbuluar diçka tjetër. Kuçi i thotë se është bërë me zell nga prokurori shqiptar, teksa e këshillon të qëndrojë disa ditë brenda banesës. Plaku nuk kursen batutat.

FLODJAN PLAKU: Vlla, tani me thanë që mi ka lënë prokurori sepse e ka marrë vesh që më kanë liruar dhe i ka lënë me shërbim ruajtje në arrest 24 orë derisa t’vij konfirmimi po besoj nesër maksimumi pasnesër vin dhe më lën t’lir

REZART KUÇI: S’besoj të ketë noi gjë për tu shqetësuar. Po pse i ke q*re gruan ti atij? Që e paska marrë kaq me vrullë ai. Ok shumë mirë

FLODJAN PLAKU: Po i ka ardh inat pse s’më çoj në Itali e më liroi Italia më para hahaha

REZART KUÇI: Mirë mos luj se si dihet. Se mos sjell noi shërbim tjetër përveç atyre që shef ti. Mbështillu në shpi sa të vijnë letrat

FLODJAN PLAKU: Po po vlla kudo vete se mezi i mbylla në Itali, më mirë duroj ca ditë brenda t’njoh dhe t’shpis se I kemi harruar fytyrën haha

REZART KUÇI Hahhaahhahahahhaha

Për këtë rast, punonjësi i policisë i ngarkuar me detyrimin ligjor për ruajtje të sekretit hetimor, zbatimin e ligjit, në kundërshtim të hapur me ligjin, ka nxjerr informacion konfidencial operacional, duke rrezikuar dështimin e operacionit, si dhe ka dëmtuar rëndë interesat e shtetit, rendin juridik dhe besimin e publikut tek organet e rendit.

Në një episod tjetër, Rezart Kuçi, rezulton se ka shkuar me shërbim për kërkimin e një personi dhe në banesën ku ka shkuar ka gjetur një aparat celular. Gjatë këqyrjes së aparatit celular është evidentuar nga ana e tij një mjet gomone. Ai ia çon foton e Gomones Ervis MAtodashajt dhe ky I fundit I thotë se është e një shokut të tij. Pasi mëson këtë, oficeri e fshin foton nga celulari I sekuestruar, duke dëmtuar provat materiale.

Tjetër episod, ku Rezart Kuçi, kontaktohet nga një përdorues i paidentifikuar nga SPAK në SKY ECC. I kërkohet informacion mbi vendndodhjen e një shtetasi me emrin Bujar A. Sipas kërkuesit, ka një detyrim 40 mijë eurosh për çështje droge dhe se jeton në Ankona. Pas disa orësh, Rezart Kuçi i dërgon të dhënat që iu kërkua nga bashkëbiseduesi shoqëruar me fotografi personale. Për detaje shtesë rreth vendndodhjes dhe profilit të personave që kërkon, oficeri i policisë lë takim në Tiranë, por pala tjetër nuk shkon, por i dërgon mikun e tij të interesuar. Kuçi flet me të edhe se sa para ti kërkojë.

REZART KUÇI: Ça thua s’je këtu ti?

РC70ТO: Ika mjes jam n’Tiran vlla janë te ‘Davinci’ ata çunat për 5 min aty po ulen. Ika se kisha takim mu desh patjetër të vija janë 600 mij euro borxh këtej nuk po më hyjnë në sy ato me 40 aty 20 hahaha...takoj ti po s’ke punë vlla ke Iliri i gjen

REZART KUÇI: O vlla duhet të ishe këtu sot. Ose e linim për ditë tjetër.

PC70TO: O vlla po kisha takim në Tiranë sot për punë Turqis po tako atë qerosin vlla atë shokun tim e njëjta është pa merak fol me të vlla. I thash e kam shok për ty por pa lekë nuk bëhen punët e di vetë ai vlla më tha ndaj fol pa merak me të. O vlla, më  thuj sa lek ti them, që mos të jesh siklet ti fare...

Lajmi në përditësim...

Rendit zhvillimet sipas orarit:

Të Fundit Të Parat