Kombëtarja shqiptare e futbollit i ka nisur me humbje eliminatoret e Europianit "Euro 2020" pasi ndeshja e parë e luajtur në Shkodër kundër Turqisë ka përfunduar me rezultatin 0-2. Edhe pse kuqezinjtë e Panucci-t e nisën shumë mirë ndeshjen, në minutën e 21 u ndëshkuan nga Burak Ylmaz i cili finalizoi një aksion të dhuruar nga mbrojtja shqiptare.

Pavarësisht përpjekjeve të kuqezinjve pjesa e parë u mbyll me rezultatin 0-1, ndërsa në momentin më të mirë të Shqipërisë në pjesën e dytë Turqia realizoi edhe golin e dytë. Ishte Çalhanoglu në minutën e 55, që nga jashtë zone mposhti Berishën me një supergol. Më pas deri në fundin e lojës rezultati mbeti i pandryshuar, duke shuar edhe atë pak entuziazëm të tifozëve që ekzistonte pas paraqitjeve të dobta në Ligën e Kombeve.

Gjithsesi pas 3 ditësh Shqipëria do të ketë shansin për të marrë pikën e parë pasi do të luajë në transfertë kundër Andorës.

Rendit zhvillimet sipas orarit:
Ora 22:23
Tifozët godasin me shishe Berishën, nisin edhe të sharat në kor ndaj Panucci-t

Goli i dytë i realizuar nga Calhanoglu ka sjellë edhe irritimin e tifozëve shqiptarë të cilët kanë tentuar të godasin futbollistin e Milanit pasi ky i fundit ka provokuar duke festuar poshtë tribunës së tyre. Shishet e hedhura përveçse lojtarëve turq kanë kapur edhe portierin Berisha.

Ndërkohë si pasojë e rezultatit tifozët kanë nisur të shajnë në kor trajnerin italian Panucci, me korin: " Panuçi, Panuçi, vaffanculo."

Ne.k./Shqiptarja.com

Ora 20:49
Shqipëria i nis me humbje eliminatoret, Turqia fiton pastër në "Loro Boriçi"

1' Në stadiumin "Loro Boriçi" të Shkodrës ka nisur ndeshja mes Shqipërisë dhe Turqisë

21' Gabime të njëpasnjëshme nga mbrojtësit tonë dhe Ylmaz ndëshkon Shqipërinë, 0-1

45+4' Përfundon pjesa e parë e Shqipëri-Turqi me rezultatin 0-1

46' Ka nisur pjesa e dytë në Shkodër me shpresë se Shqipëria do të përmbysë rezultatin

55' Tuqia realizon golin e dytë me Calhanoglu i cili realizon një supergol

90+6' Ka përfunduar me rezultatin 0-2 ndeshja Shqipëri-Turqi

Ne.k./Shqiptarja.com

Ora 19:48
Publikohen formacionet zyrtare, surprizë në 11 shen e hedhur në fushë nga Panucci

Në prag sfidën me Turqinë trajneri i kombëtares Christian Panucci ka befasuar jo pak me formacionin titullar. Në ndeshjen e parë eliminatore të "Euro 2020" italiani ka zgjedhur të zbresë në fushë me skemën 3-5-2, ku në majë të sulmit nuk do të jetë Armando Sadiku, por Bekim Balaj.

Këtërkëndorin e portës do të mbrojë Berisha, ndërsa para tij do të qëndrojnë Gjimshiti, Veseli dhe Ismajlaj.  Në të majtë të mesfushës do të jetë Hysaj, ndërsa në të djathtë Ivan Balliu, i cili ka fituar balotazhin me Naser Alijin.

Në qendër të mesfushës është rikthyer 'pitbulli' Abrashi, i cili do të mbeshtet nga Xhaka dhe Memushaj, ndërkohë që Uzuni do të mbështesë Balajn e vetëm në sulm.

Sa i takon Turqisë trajneri Gynesh nuk është kursyer duke hedhur në sulm që në fillim treshen e frikshme Calhanoglu, Burak Ilmaz dhe Cenk Tosun.

Formacionet zyrtare

Shqipëria: Berisha, Hysaj, Veseli, Gjimshiti, Balliu, Ismajli, Xhaka, Memushaj, Abrashi, Uzuni, Balaj. Trajner: Kristian Panuçi

Turqia: Gunok, Ali Kaldirim, Emre, Jokuslu, Gonul, Tosun, Çalhanoglu, Tekdemir, Demiral, Burak Jilmaz, Ajha. Trajner: Senol Gunesh

Ne.k./Shqiptarja.com

Ora 19:19
Debuton trajneri historik i 2002, Turqia kërkon lavdinë e dikurshme

Ndeshja e sotme është e rëndësishme për Shqipërinë por për turqit është një rikthim në kohët e vjetra. Pas 15 vitesh rikthehet trajneri 'ikonë' i Turqisë, Şenol Güneş, ai i cili si askush më parë arriti të çonte në gjysëmfinale të një botërori, Turqinë e tij.

Madje ai ekip do të eleminohej nga Brazili i Ronaldinhos, Fenomenit, Rivaldos, Cafu, Roberto Carlos me një gol të Ronaldos në minutën e 49'. Brazili do të fitonte Kupën e Botës atë vit, ndërsa Turqia do të mposhte pritësit e kompeticionit Korenë e Jugut, të cilët atë vit eleminuan Italinë dhe Spanjën. Ata të cilët e kujtojnë atë ekip e mbajnë mend mirë teknikun Şenol Güneş, dhe punën e tij të jashtëzakonshme. Edhe pse pa emrat e mëdhenj të asaj kohe, pritet të shihet debutimi i Güneş për herë të dytë në pankinën turke.