E pazakontë/ Qytetari nga frika zvarritet poshtë makinës për t'i shpëtuar policisë...lezhjani shpëton për një qime (VIDEO)

Në Gjirokastër policia po kontrollon situatën nga ajri me dron nëse qytetarët po e zbatojnë urdhrin për të qëndruar në karantinë në shtëpi. Pasditen e sotme, dy të rinj për t'i shpëtuar patrullës së policisë në rrugë ia mbathën me vrap nëpër rrugicat e qytetit, por nuk i bënë llogaritë mirë, pasi harruan dronin mbi kokat e tyre, që i ndoqi këmba këmbës deri në momentin që dy këmbësorët u fshehën në një shkëmb.

Rastet kur qytetarët kanë thyer karantinën kanë qenë sporadike, 78 janë kapur nga policia, por disa kanë arritur të shpëtojnë, si në rastin e një të riu nga Lezha. I riu po lëvizte në rrugën e 'Shtrausit' në Lezhë sot rreth orës 16:30, kur i është fshehur policisë në një nga muret e një pallati. Report Tv sjell pamjet, kur frika ndëshkimit e ka detyruar qytetarin të qëndrojë pas murit, teksa dy makina policie po patrullonin në rrugë, duke monitoruar situatën për zbatimin e urdhrit që kufizon lëvizjen e njerëzve dhe automjeteve. Sapo makinat e policisë kaluan, qytetari doli sërish në rrugë për të shkuar në destinacionin ku ishte nisur. Qyteti i Lezhës është i boshatisur që prej orës 13:00 të së shtunës dhe qytetarët që nuk e kanë zbatuar urdhrin kanë qenë të paktë.