Kryetari i bashkisë së Tiranës para miratimit të buxhetit të bashkisë për vitin 2012 bëri takime në njësitë bashkiake. Sa janë pasqyruar në buxhetin e sapomiratuar hallet dhe shqetësimet e shprehura nga qytetarët në këto takime?
Punësimi, cilësia e jetës dhe infrastruktura janë shtyllat kryesore, mbi të cilat është hartuar buxheti i vitit 2012 për Tiranën. Buxheti i miratuar tashmë prej Këshillit Bashkiak, është shumë i artikuluar dhe i detajuar
në zërat e investimeve për të 11 njësitë bashkiake të kryeqytetit, duke qenë në këtë mënyrë shumë transparent dhe informues për banorët.

Përcaktimi i prioriteteteve të investimeve, u krye nga z.Basha në dialog me banorët e kryeqytetit gjatë fushatës zgjedhore, por edhe më pas me kryetarët e zgjedhur të minibashkive si dhe përfaqësues të komuniteteve nga këto njësi vendore.

Projekt-buxheti për vitin 2012, u diskutua më pas ndërmjet kryebashkiakut dhe banorëve të secilës prej 11 njësitë vendore të kryeqytetit, nga ku rezultuan shumë vërejtje dhe sugjerime, të cilat u reflektuan në variantin përfundimtar të tij, i cili u miratua në këshill.

Buxheti me një vlerë prej 70 milionë dollarë, është më i madhi në historinë e qytetit dhe do të zbatohet sipas filozofisë së drejtimit të instaluar tashme në bashki "shkurtim shpenzimesh dhe rritje investimesh". Në investimet e drejtpërdrejta të parashikuara në njësitë vendore të Tiranës, përfshihen edhe rikualifikimi urban i infrastrukturës rrugore, i ujësjellës-kanalizime, rikonstruksioni dhe ndërtimi i shkollave, kopshteve e çerdheve, ndërtim qendrash sociale, përmirësim i menaxhimit të mbetjeve urbane, krijim i hapësirave të gjelbra, ndërtim terrenesh sportive etj.

Përveç kësaj thuajse të gjitha njësitë vendore përfitojnë edhe nga impakti i projekteve madhore strategjike të zhvillimit urban të Tiranës, të cilat shtrihen në territorin e këtyre njësive. Kështu përshembull, banorët e njësisë bashkiake numër 11 janë përfituesit kryesorë të një sërë projektesh strategjike që marrin jetë gjatë vitit 2012, si ndërtimi i terminalit të ri të trenit dhe autobusëve urbanë dhe interurbanë. Po kështu Linja e Tramit, Laprakë-sheshi Nënë Tereza, rehabilitimi i Lumit të Tiranës, ndërhyrja në rrethrrotullimin e Doganës dhe mbikalimet që parashikohen të ndërtohen përgjatë rrugës së Durrësit. Të gjitha këto janë projekte që kanë impakt mbi këtë zonë si për sa i përket zhvillimit ekonomik, por edhe punësimit.

Çfare bëri dhe nuk bëri Rama në Tirane për tre mandate?
Nuk besoj se dikush mund të jetë i interesuar që unë të bëj bilancet e drejtimeve të mëparshme. Përpos kësaj analiza të tilla, gjithnjë rrezikojnë të mbartin në vetvete subjektivizëm dhe shpesh edhe doza spekullimi. Sidoqoftë, vota popullore në fund të mandatit është vlerësimi më i mirë që mund t'i bëhet çdo drejtuesi.

Ka patur shumë kritika për mbylljen e punimeve në sheshin "Skënderbej"
duke u devijuar nga projekti i mëparshëm. Ndërkohë është premtuar se forma e sheshit, si vendkalimi për makinat do të ndryshojë sërish pas tre viteve. Si do të behet kjo dhe çfarë kostosh do të paguajë qytetari për ndryshimet e shpeshta në projekt?
Para se t'i përgjigjem kësaj pyetje më lejoni t'ju kujtoj mënyrën se si filluan punimet nga Bashkia e drejtuar nga z. Rama në sheshin "Skënderbej". Kam përshtypjen se administrata e z. Rama, ende nuk ishte gati për t'i filluar ndërhyrjet në shesh pavarësisht finalizimit të një projekti për këtë qëllim. Por një zhvillim i papritur u dha planeve të Bashkisë së atëhershme një kthesë të menjëhershme. Më kujtohet se sheshi, pati degraduar në një shkallë të tillë sa që gropat dhe brazdat gjatë tij e vështirësuan aq shumë qarkullimin e mjeteve dhe të këmbësorëve dhe gjendja u bë e padurueshme. Nisur nga kjo situate, rrënimi infrastrukturor dhe madje poshtërues për sheshin historik të Tiranës, qeveria "Berisha", i kërkoi Ministrisë së Punëve Publike të hidhte një shtrese asfalt pergjate perimetrit të sheshit për të ndalur degradimin e mëtejshëm dhe mundësuar një qarkullim normal të mjeteve. Meqenëse një ndërhyrje e tillë rehabilituese e përkohshme nga qeveria, sipas Bashkisë, rrezikonte të rriste vlerën e aksioneve të kapitalit politik të qeverisë në prag të zgjedhjeve lokale, atëherë ajo vendosi të bllokonte këtë ndërhyrje me çdo kusht.

Kështu edhe pse tërësisht e papërgatitur, Bashkia
shpalli fillimin e punimeve në shesh duke e bllokuar atë me eskavatorë, mjete të rënda dhe materiale inerte. Se çfare ndodhi në ditët dhe muajt që vijuan, mendoj se nuk është e nevojshme t'ju shpjegohet qytetarëve të metropolit, ngaqë ata e vuajtën për muaj të tërë kaluarin e paralizës së trafikut dhe lëvizjes në qendër dhe madje thuajse bllokimin e kësaj të fundit. Jam i bindur se nëse do të bëhej një anketim i qytetareve të Tiranës, lidhur me natyren e punimeve kryesisht nëntokësore brenda sheshit, sigurisht që pjesa dërrmuese e tyre do të ngrinte supet.

Padyshim që me këtë nuk dua të vë në diskutim vlerën dhe racionalen e këtyre punimeve, por thjesht desha të theksoj mungesën e informimit apo
edhe paralajmërimit qytetar lidhur me atë çka po ndodhte në shesh. Ndërkaq zgjedhjet lokale të Majit, e gjeten sheshin në një gjendje "infarkti" urban dhe të bllokuar prej nje pirgu inertesh e mbetjesh ndërtimore nga
punimet e papërfunduara dhe për më tepër që nuk paraqitnin ndonjë perspektivë finalizimi.

Këtë gjendje trashëgoi administrata jonë e re e dalë nga zgjedhjet, së bashku me stresin dhe irritimin qytetar gjithnjë në rritje nga bllokimi pa afat i qendrës, por edhe paralizimin e jetës ekonomike dhe sociale rreth sheshit dhe më gjerë. Në këtë mënyrë që në ditët e para ne u ndodhëm përpara presionit në rritje për zhbllokimin sa më parë të qendrës së Tiranës nëpërmjet një zgjidhje sa më të shpejtë dhe dinjitoze. Në fundin e nëntorit të vitit të kaluar, ne ju kthyem qytetarëve të Tiranës sheshin e tyrehistorik si një zgjidhje prestigjoze, estetike dhe mjaft dinjitoze ku hapësirat për qarkullimin e mjeteve, këmbësorëve, biçikletave, harmonizohen brenda një përmase gjelbërimi të panjohur më parë. Ju garantoj se asnjë qindarkë nga punimet e mëparshme nuk shkoi dëm, përkundrazi ato morën një vlerë disa herë edhe më të shtuar si rrjedhojë e zgjidhjeve inteligjente dhe kurajoze urbanistike.

Ju më pyesni nëse sheshi do të ndryshojë në të ardhmen?!
Për mua sheshi nuk është një gjë e ngurtë dhe formatuar një herë e përgjithmonë, sepse ai nuk ka se si të mos ndikohet nga dinamika e zhvillimeve të vrullshme urbane të perspektivës që do të përfshijnë kryeqytetin, si përshembull ndërtimi i bulevardit të ri të Tiranës i cili
shtrihet deri në Paskuqan si dhe shumë zhvillime të tjera. Këto ndikime nuk do të zhvlerësojnë investimet aktuale, por do t'i mbivlerësojnë ato nëpërmjet modifikimeve përmirësuese strukturore.