Eduard Zaloshnja: Rama synon të paktën 86 mandate, por a do t’i arrijë?

Edi Rama mblodhi dje drejtuesit politikë të qarqeve të PS dhe kryebashkiakët e majtë të vendit tek Pallati i Kongreseve. Edhe pse nuk ka patur ndonjë deklaratë publike pas asaj mbledhjeje, qarkullojnë zëra se Rama ka kërkuar përmirsim të rezultatit të PS-së në çdo qark, krahasuar me zgjedhjet e vitit 2021.

Më 2021, PS-ja siguroi 74 mandate parlamentare. Në qoftë se arrihet përmirësim rezultati i PS-së në çdo qark, i bie që të marrë të paktën 86 mandate më 2025 (74 plus nga 1 në 12 qarqet). Po sa e mundur është kjo?

Nga një analizë statistikore e rezultateve zyrtare të zgjedhjeve të vitit 2021, rezulton se PS-ja mori mbi 104 mijë vota të vlefshme më shumë se ç’i duheshin për 74 mandatet që siguroi në ato zgjedhje. Kjo llogaritet duke ulur votat e PS-së në secilin qark deri në atë pikë ku mandatet e saj nuk do të rrezikoheshin nga partitë e tjera në garë.

Për shembull, në Qarkun Tiranë PS-ja do të siguronte po 18 mandate, edhe sikur të merrte 21715 vota të vlefshme më pak seç mori. Ose në Qarkun Elbasan do të siguronte po 8 mandate edhe sikur të merrte 20078 vota të vlefshme më pak seç mori (shihni tabelën shoqëruese).

 Analiza e sipërpërmendur shërben si udhërrëfyes statistikor për mundësinë e shtimit nga 1 mandat për PS-në në çdo qark.

Qarku Tiranë është kandidati më i mundshëm, sepse PS-ja mori atje 21715 vota të vlefshme më shumë seç i duheshin për të siguruar 18 mandatet e 2021-shit. Për më tepër, si rrjedhojë e rritjes së numrit të shtetasve që figurojnë në regjistrin e Gjendjes Civile të qarkut, Tirana do të ketë 37 mandate parlamentare (nga 36 që kishte).

Qarku Elbasan është kandidati i dytë më i mundshëm, sepse PS-ja mori atje 20078 vota të vlefshme më shumë seç i duheshin për të siguruar 8 mandatet e 2021-shit.

I treti është Qarku Dibër, ku PS-ja mori 14232 vota të vlefshme më shumë seç i duheshin për të siguruar 2 mandatet e 2021-shit.

Në qarqet Shkodër, Lezhë, Durrës, Fier, Vlorë e Korçë është statistikisht e mundshme që PS-ja të shtojë nga një mandat, në qoftë se i përmirëson disi përqindjet e votave të 2021-shit. Më e vështirë do të jetë në qarqet Berat dhe Gjirokastër, ndërsa pothuaj e pamundur në Qarkun Kukës.

SHËNIM: Në ndonjë qark ku kryebashkiakët e PS-së shënuan epërsi të thellë ndaj kandidatëve të Berishës, ekziston mundësia që PS-ja të shtojë nga 2 mandate, krahasuar me 2021-shin.

Xh.K/S.G/Shqiptarja.com

TAG:
• Eduard Zaloshnja
• edi rama