Drafti i Ramës për Asociacionin, Escobar dhe Lajçak: Propozim serioz! Tensionet në veri të Kosovës kanë potencial të shndërrohen në konflikt rajonal

Emisari i Bashkimit Evropian për dialogun Kosovë-Serbi, Miroslav Lajçak, dhe emisari amerikan për Ballkanin Perëndimor, Gabriel Escobar, kanë thënë se është kërkesë e partnerëve ndërkombëtarë, BE-së dhe SHBA-së që menjëherë të lirohen tre policët kosovarë, të kidnapuar nga Serbia.

Ata kanë refuzuar të japin ultimatume se deri kur duhet të lirohen policët, por kanë thënë se kërkojnë që kjo të ndodhë menjëherë. Të dy janë shprehur “shumë të shqetësuar” për situatën në veri të Kosovës.

“Ne themi menjëherë. Pozicioni ynë është se nëse janë kidnapuar apo kanë hyrë gabimisht në territorin e Serbisë, s’e kanë pasur këtë qëllim. Ata duhet të kthehen”, ka thënë Escobar në “Atlantic Council” të martën. Lajçak ka miratuar kërkesën e SHBA-së duke thënë se pajtohet me të.

Lajçaku ka thënë se prioritet kryesor i ndërkombëtarëve është shtensionimi e kthimi në dialog.

“Nëse nuk arrijmë ta shtensionojmë, do të kemi viktima. Këtë s’mund ta pranojmë”, ka thënë Lajçaku. Ai ka përsëritur kërkesën e BE-së për zgjedhje të reja, me pjesëmarrjen e të gjithë serbëve, pa parakushte.

Ndërsa Escobari ka theksuar se sheh “potencial për konflikt rajonal”.

I dërguari i Posaçëm i SHBA për Ballkanin, Gabriel Escobar tha se drafti i kryeministrit Edi Rama për Asociacionin në Kosovë ishte tepër konstruktiv dhe bëri thirrje që njerëzit ta lexojnë, pa lënë të kuptohet nëse është bërë publik tashmë.

“Ishte një draft shumë konstruktiv. Iu bëj thirrje njerëzve që ta lexojnë,” – u shpreh ai.

Escobar përsëriti qëndrimin e shprehur në një opinion bashkë me nënsekretarin Derek Chollet se Asociacioni duhej të ishte në përputhje me Kushtetutën e Kosovës.

Më tej shtoi se mendonte që Kurti ishte pajtuar me Asociacionin e propozuar në takimin e Ohrit të mbajtur në 18 mars.

Gabriel Escobar, i dërguari  amerikan për Ballkanin Perëndimor, ka thënë se Shtetet e Bashkuara të Amerikës nuk kanë qenë asnjëherë të vështira ndaj Kosovës e të buta ndaj Serbisë.

“Gjithçka që kemi bërë në 90 ditët e fundit dhe 15 vjetët ka qenë në favor të Kosovës. Serbia s’donte që ta njihnim, por ne e bëmë. Serbia s’donte kampanjë njohjesh, por ne e bëmë. Edhe në 90 ditët e fundit, Serbia donte t’i bënim presion Kosovës që t’i shmangë zgjedhjet, ne nuk e bëmë. Donte që të thoshim se zgjedhjet ishin të paligjshme, ne nuk e bëmë. Donte të thoshte se kryetarët ishin të paligjshëm, ne nuk e thamë dhe i njohëm. Sfidoj këdo që të më tregojë se ku kemi qenë të vështirë me Kosovën e të butë me Serbinë”, ka thënë ai duke shtuar se SHBA-ja e ka shtyrë Kosovën në çështjen e Këshillit të Evropës dhe se nga Kosova kërkon “koordinim të ngushtë”.

“Gjithashtu t’i kuptojë obligimet e veta ndërkombëtare. S’mendoj se kjo është diçka që ne ishim të vështirë ndaj Kosovës. Përkundrazi, e kundërta”, ka thënë Escobar.

I dërguari i BE-së për dialogun Kosovë-Serbi, Miroslav Lajcak, ka thënë se s’ka afat për mbajtjen e zgjedhjeve të parakohshme për katër komunat në veri të Kosovës, megjithatë thotë se BE bën thirrje që ato të caktohen sa më shpejtë, raporton Gazeta Express.

“S’ka afat për zgjedhjet. Gjithçka varet nga vullneti politik. Por ne bëjmë thirrje që të mbahen menjëherë. Ka procedura kushtetuese qe duhet të ndiqen qe kryetarët të dorëhiqen, askush nuk dëshiron të shtyjë një zgjidhje jashtë kornizës kushtetuese të Kosovës. Por deri tani s’kemi parë vullnet politik për zgjedhje të parakohshme”, ka thënë Lajcak.