Greqia, Italia dhe Spanja po orientohen drejt një plani të përbashkët, nën kujdesin e Bashkimit Evropian për përballimin e fluksit të refugjatëve, deklaroi për parlamentin grek, ministri i Brendshëm Nikos Vucis, ndërsa theksoi se qeveria greke ka hartuar faktikisht një plan kombëtar veprimi, i cili do të komunikohet brenda ditëve të ardhshme.
Ministri theksoi gjithashtu se në kuadër të punës përgatitore për planin, siç u konkludua në ministeralin e të hënës në Luksemburg, komisioneri për emigracionin Dhimitris Avramopulos do të zhvillojë takime me ministrat e të tre vendeve.
Sipas Vucisit, mbrojtja bregdetare do të funksionojë në mënyrë parandaluese, por pa vënë në rrezik jetët e njerëzve.
Sipas ministrit, emigrantët nuk duhet të qëndrojnë në ishuj më tepër se tri ditë, derisa të transferohen në brendësi të pjesës kontinentale.
"Më tej, qeveria po shqyrton mundësinë e disponimit të një anijeje të posaçme që do të kalojë nga ishulli në ishull dhe do të marrë emigrantët", theksoi Vucis.
Ministri tha se në Egjeun Verior ka mjaft ambiente që do të mund të bëheshin qendra regjistrimi dhe prej andej emigrantët të dërgoheshin në pjesën kontinentale, ndërsa në Egjeun Jugor, ku këto infrastruktura nuk ekzistojnë, po krijohen./ atsh/