TIRANE - Largohet nga sistemi i drejtësisë në prag të vettingut gjyqtari i Gjykatës së Apelit në Tiranë, Agim Bendo. Report Tv mëson se gjyqtari e ka paraqitur kërkesën e dorëheqjes në Këshillin e Lartë Gjyqësor me argumentin për asye shëndetësore, e cila është pranuar në mbledhjen e sotme, raporton gazetari Arsen Rusta.

Verifikimet për gjyqtarin e Gjykatës së Apelit Tiranë, Agim Bendo, i cili është pronar i disa pasurive kishin nisur që gjatë muajit shtator të vitit 2018, ndërsa në ditët dhe javët do të dilte para vettingut, por i ka bërë parapriRë duke u larguar nga sistemi. 

Agim Bendo ka gjykuar disa çështje të bujshme në historinë e drejtësisë shqiptare, nga 21 Janari, te dosja "Hakmarrja për Drejtësi", çështja e ish-guvernatorit të Bankës së Shqipërisë, etj.

21 Janari ishte një nga dosjet e bujshme që gjykoi, por cfarë u vendos dhe cili ishte qëndrimi i Bendos?

Vendimi në fjalë në Apel dënoi me 1 vit burg Ndrea Prendin, kreun e Gardës së Republikës, i cili vrau Faik Myrtajn, si edhe me tre vjet burg gardistin Agim Llupo, për vrasjen e Ziver Veizit. Por në të dyja rastet, gjykata argumentoi në vendimin e saj se nuk është provuar që Prendi dhe Llupo i kanë kryer me dashje vrasjet. Bendo, ashtu si dy anëtarët e tjerë të trupi gjykues Ervin Metalla dhe Evjeni Sinojmeri i cilësuan si vrasje nga pakujdesia.

Përsa i përket dosjes së Bankës së Shqipërisë, Bendo ka qenë tek vendimi për caktimin e masës së sigurisë për arrestimin e zyrtarëve të bankës lidhur me rastin e vjedhjes se thesarit, ku ka liruar pjesën më të madhe të tyre. Gjyqtari ka qenë pjesë edhe te vendimi për Gentian Dodën, që la në fuqi vendimin me 8 vite burg duke sjellë lirimin e tij, pasi i mbaronte dënimi pas një jave. Ai ka qenë në të njëjtin trup gjykues me Shkëlqim Mirin, që u arrestua.