Frymëzuese/ Lezhjani hap dyert e shtëpisë së tij për dy familje ukrainase: E di çfarë do të thotë të vuash, e ndjej të bëj diçka për njerëzit në nevojë! Edhe një mesazh politik

“Bamirësia nuk të varfëron”, kjo moto e përshkruan më së miri qytetarin lezhjan Gjergj Kadeli, i cili hapi dyert e shtëpisë së tij për njerëzit në Ukrainë, që ndodhet në një moment të vështirë dhe që duan t’i shpëtojnë luftës.

Ai e di se çfarë do të thotë të vuash, Gjergi ka qenë një emigrant për 15 vjet dhe e ndjen më shumë se kushdo nevojë për të ndihmuar, pasi e ka ndjerë frikën në supet e tij.

Gjergji hapi dyert e shtëpisë së tij në fshatin Manati edhe për Report Tv, për të na treguar se brenda saj mund të strehoren një ose edhe dy familje dhe të jetojnë të qetë, pa zhurmën e bombarimeve.

“Nuk e mendova se do të merrte përmasa mediatike, ishte instinkti njerëzor ai që më udhëhoqi. U ndjeva i dobët për të shprehur solidaritetin, ndaj po vë në dispozicion banesën time që e kam ndërtuar me mund dhe djers që të strehohet një familje apo dy. I bëj thirrje të gjithëve të ndihmojnë. Është 213 metra katror, ka 4 dhoma gjumi, një kuzhinë dhe tre tualete. Ka avlli prej 2 dynymë që do të shërbejë për nevojat dhe dëshirat e personave që do të akomodohen këtu.”, tha ai.

Dëshira për të ndihmuar për qytetarin nga Lezha është nevojë e brendshme dhe e domosdoshme edhe përse nuk është i pasur, ai mund t’i mundësoi dy familjeve ukrainase një banesë të ngrohtë.

“E ndjej të bëjë diçka për personat që janë në nevojë. Ne si popull e kemi treguar veten në këto raste. Unë në mënyrën time dua të jap prezencën time në këtë popull, të jap dhe vëmendjen në pjesën tjetër të botës. Unë kam qenë në emigrim për 15 vite, sigurisht jemi ndodhur në nevojë dhe na kanë ofruar ndihmë, Kur i përjeton gjërat në vetën e parë, je më i ndjeshëm ndaj situatave të tilla.”, u shpreh ai.

Duke folur për Report Tv, Gjergji e cilësoi këtë luftë të egër një çmenduri e cila nuk mund të ketë vend në shekullin 21.

“Shekulli 21 të bëhen luftëra të tilla, kjo është një çmenduri! Sigurisht që jam kundra, kjo botë me këta njerëz të çmendur me armë në dorë është e pasigurt.”, tha ai.

Lezhjani tha se për këtë vendim kaq frymëzues ka mbështetjen e të gjithë familjes së tij dhe është një veprim që po e bën me gjithë zemër.

Në fund ai dha edhe një mesazh politik.

"Nuk ka rëndësi majtas apo djathtas  Populli shqiptar do të përkrahë  një vendim pozitiv për strehimin e emigrantëve, kemi kaluar vuajtje vetë në kurrizin tonë ndër shekuj", u shpreh ai.

J.GJ./M.Q./Shqiptarja.com

TAG:
• kriza ukraine-rusi
• rusia sulmon ukrainen
• gjergj kadeli
• Lezhe