Reshjet e shiut të cilat përfshinë këtë të mërkurë rajonin e Gjirokastrës janë shoqëruar me shkarkesa statike të cilat kanë sjellë jo pak probleme ku një stan me bagëti u përfshi nga flakët dhe u dogjën 50 krerë dele.

Sipas të dhënave të para bëhet e ditur se ngjarja ka ndodhur në fshatin Golem, fshat që është 20 kilometër në veri të qytetit të Gjirokastrës.

Rrufeja ka rënë në stanin e Strokajve duke djegur të gjithë krerët e bagëtive që gjendeshin aty.

Ndonëse banorët e fshatit kanë shkuar për të nxjerrë delet që gjendeshin brenda stanit, kjo ka qenë e pamundur pasi gjithçka është përfshirë nga flakët.

Dëmi ekonomik që i është shkaktuar fermerit është e lartë, ndërkohë që raportohet se nga ky rast nuk ka pasur të lënduar në njerëz.

Redaksia Online
(F.T/shqiptarja.com)