Gjykata Supreme e Shteteve të Bashkuara vendosi se presidenti Donald Trump, për momentin, nuk mund të vazhdojë me shkarkimin e guvernatores së Rezervës Federale, Lisa Cook. Vendimi, i marrë me pesë vota pro dhe katër kundër, përbën një pengesë për presidentin amerikan dhe ruan pavarësinë e Rezervës Federale.

Presidenti kishte urdhëruar shkarkimin e Guvernatores për parregullsi të pretenduara lidhur me kreditë hipotekare. Cook i hodhi poshtë akuzat, duke deklaruar se “nuk kam asnjë qëllim të frikësohem apo të jap dorëheqjen nga detyra ime, për shkak të disa çështjeve të ngritura në një postim”.

Vendimi i Gjykatës

Kryetari i Gjykatës Supreme, John Roberts, shpjegoi se lejimi i Trump-it për të larguar Cook do të hapte rrugën që Presidenti të mund të shkarkonte një anëtar të Rezervës Federale në çdo moment, për çfarëdo arsye, pa paralajmërim dhe pa asnjë kontroll gjyqësor pasues. Kryetari Roberts dhe kolegu i tij konservator Brett Kavanaugh u rreshtuan kundër shkarkimit të Cook së bashku me tre gjyqtarët liberalë të Gjykatës, Sonia Sotomayor, Elena Kagan dhe Ketanji Broën Jackson.

Trump rikthehet të sulmojë Cook

Pas vendimit, presidenti u rikthye të sulmonte guvernatoren e Rezervës Federale në Truth. Në një seri postimesh, presidenti amerikan pretendon se vendimi është marrë ‘mbi baza thjesht procedurale’ dhe siguron se administrata e tij do të veprojë ‘menjëherë’ për të penguar që ‘ata që kanë kryer shkelje të marrin vendime jetike për mirëqenien e Shteteve të Bashkuara’. Trump përsërit akuzat ndaj Cook, duke argumentuar se qëndrimi i saj në bordin drejtues të Fed-it është i papajtueshëm me detyrën që ushtron.

Vendimi tjetër që zgjeron kompetencat e presidentit

Në një tjetër vendim, po të hënën, më 29 qershor, Gjykata Supreme i njohu presidentit kompetenca të gjera për të shkarkuar, pa qenë i detyruar të japë arsye, drejtuesit e agjencive të tjera federale të pavarura. Vendimi, siç kanë theksuar mediat amerikane, duket në kontrast me vendimin që bllokoi, të paktën për momentin, shkarkimin e guvernatores së Fed-it. Këtë e dëshmon edhe reagimi i Trump-it, i cili në këtë rast e priti vendimin me tone triumfaliste, duke deklaruar se ai ka ‘kapërcyer plotësisht dhe pa asnjë dyshim’ një precedent juridik në fuqi prej 90 vitesh, duke forcuar ndjeshëm kompetencat e presidencës.

Refuzohet ankesa e Trump kundër Carroll

Po gjatë ditës së hënë, Gjykata Supreme njoftoi se nuk do të shqyrtojë ankesën e paraqitur nga Donald Trump kundër vendimit të një jurie federale në Nju Jork, e cila e kishte dënuar Presidentin të dëmshpërblente me 5 milionë dollarë shkrimtaren E. Jean Carroll, pasi e kishte shpallur përgjegjës për abuzim seksual dhe shpifje ndaj saj. Refuzimi për të shqyrtuar ankesën përbën një humbje për presidentin amerikan, po aq ose edhe më të rëndë se vendimi për shkarkimin e Lisa Cook. Edhe në këtë rast, Trump nuk vonoi të shprehte pakënaqësinë e tij. “Çuditërisht, Gjykata Supreme refuzoi të ‘shqyrtojë’ një çështje të rreme të ngritur kundër meje nga një grua që nuk e kam takuar kurrë (një fotografi me një personazh të njohur, bërë dekada më parë, ku ajo ishte në radhë me bashkëshortin e saj, nuk provon asgjë!). Do të vazhdoj ta luftoj këtë rast të instrumentalizimit të drejtësisë dhe të ‘lawfare’, përfshirë edhe akuzën qesharake për shpifje, me gjithë forcën dhe vendosmërinë time”, komentoi ai në Truth.