Gjyqi në GJKKO/ Ndahet dosja ‘Meta’, gjykim i shkurtuar për Fatime Kryemadhin, Çokun dhe Xhixhon! Ish-presidenti në kafaz: S’mbaj përgjegjësi për veprimet e ish-gruas

Kryetari i Partisë së Lirisë, Ilir Meta, është shprehur se ditën e sotme vetë Prokuroria e Posaçme ka rrëzuar akuzën kryesore ndaj tij, atë për 'lobimin 1 milionë dollarë për një foto me Presidentin Donald Trump' (gjatë mandatit të tij të parë si President i SHBA).

Komentet Meta i bëri përmes një postimi në rrjetet sociale, pas seancës së sotme të zhvilluar në GJKKO për dosjen ‘Meta-Kryemadhi’.

Duke theksuar se kallëzimi ndaj tij është ngritur nga akuza të rreme, Meta premtoi se edhe akuzat e tjera të ngritura ndaj tij do të ‘çmontohen’ njëra pas tjetrës.

Reagimi i Metës:

Sot, në seancën radhës të gjykimit në themel, vetë Prokuroria rrëzoi akuzën kryesore ndaj meje për gjoja lobimin 1 milion USD për një foto me Presidentin Trump.

Para gjykatës prokurori pohoi se bëhet fjalë vetëm për një pagesë të ligjshme prej 15 mijë USD për McKeon Group, pikërisht ajo që kam deklaruar publikisht, por edhe në SPAK, që para 3 vitesh, kur jam thirrur për këtë çështje.

Shikoni tani titujt e lajmeve të rreme të “Mother Jones” dhe “Kronen Zeitung”, të sponsorizuara me paratë e inceneratorëve dhe të mafias ndërkombëtare, mbi të cilat u ndërtua kallëzimi i rremë dhe akuza kryesore kundër meje, akuzë mbi të cilën u mbështet rrëmbimi dhe izolimi im politik prej 19 muajsh, akuzë që sot u rrëzua nga vetë Prokuroria.

Durim! Edhe akuzat e tjera do të çmontohen njëra pas tjetrës.

 

Avokati i ish-Presidentit Ilir Meta është shprehur se Ilir Meta dhe Monika Kryemadhi do të gjykohen me gjykim të zakonshëm, pasi sipas tij, kërkojnë që të provojnë pafajësinë.

Komentet avokati Kujtim Cakrani i bëri gjatë fjalës së tij pas përfundimit të seancës në GJKKO për çështjen ‘Meta-Kryemadhi’, ku tha se Meta ka rreth 120 dëshmitarë dhe prova të mjaftueshmë për të provuar pavlefshmërinë e procesit.

“Çështja do të hidhet në short, dhe presim që trupi i ardhshëm të shqyrtojë cështjen në themel për Ilir Metën dhe Monika Kryemadhin. Ne do paraqesim provat tona, për pavleftshmëri, por edhe për marrjen e provave. Kemi rreth 120 dëshmitarë nga ana jonë.

Metën dhe Kryemadhin i bashkon gjykimi i zakonshëm, dhe ne normal që do shkojmë me gjykim të zakonshëm se duam të provojmë pafajësinë. Prokurori s’kishte prova për të fajësuar zotin Meta, sepse ai nuk hynte në asnjë bisedë telefonike, e-mail apo takime”, tha mes të tjerash Cakrani.

Teksa dënoi mbajtjen e Metës në kafaz xhami gjatë seancës gjyqësore, Cakrani tha gjithashtu se gjendja fizike e ish-Presidentit është shumë e mirë.

Lidhur me deklaratën e Metës ‘nuk mbaj përgjegjësi për veprimet e ish-gruas’, avokati Cakrani tha se Kryemadhi e ka marrë vetë përgjegjësinë (për veprimet e saj) që kur është pyetur në Prokurori gjatë hetimeve paraprake.

“Pavarësisht se Meta është i izoluar në kafaz për turpin e kësaj drejtësie, ishte shumë mirë dhe nga ana fizike, ishte palestrato, padyshim edhe nga ana mendore.

Përgjegjësinë Kryemadhi e ka marrë vetë që kur është pyetur në prokurori gjatë hetimeve paraprake. Nuk besoj që merret prokurori me shtëpinë, besoj se merret bashkëshortja e prokurorit”, është shprehur Cakrani.

Monika Kryemadhi është shprehur se ish-bashkëshorti i saj, Ilir Meta, është në ‘top formë’ nga ana fizike.

Komentet Kryemadhi i bëri pas daljes nga ambientet e GJKKO-së, ku u zhvillua seanca gjyqësore për dosjen ‘Meta-Kryemadhi’.

Teksa komentoi pretendimet për një rënie fizike të Ilir Metës gjatë qëndrimit në qeli, Kryemadhi tha se gjatë seancës së kaluar ish-Presidentit i kishin çuar gabimisht një kostum më të madh që e tregonte të dobët.

Një episod 'i veçantë' i ndodhur gjatë seancës gjyqësore, sipas Kryemadhit ishte rrjedhja e ujit të kondicionerit mbi kokat e të pranishmëve. Duke folur për dosjen, ajo tha se hetimi ndaj saj dhe Ilir Metës është politik dhe nuk ka prova për fajësimin e tyre.

“Nuk kishte tensione. I vetmi tension ishte që filloi të na pikonte kondicioneri i ri te salla e re. Ishin blloku tubat. Normalisht që 3 të tjerë do veçoheshin sepse ajo është një çështje politike dhe do një durim strategjik. Gjyqi mes meje, Ilir Metës dhe drejtësisë së re është një gjyq politik dhe ne që kemi qenë edhe shkaktarët e Reformës në Drejtësi, do paguajmë ato faturat tona, që do i paguajmë dhe po i paguajmë. Por s’kemi pse marrim me vete edhe njerëz të pafajshëm. Ndarja e çështjes është diçka pozitive. Analiza financiare e bërë për mamanë time, e tregon dhe ja jep të sakta që ajo ka burime financiare dhe të ardhura në të gjithë jetën e saj. Edhe çështja për shoqen time, Ema Çokun, është një pretendim që thonë ata pse ke bërë ti një deklaratë noteriale në 2024. Po normal sepse në 2010 ata nuk ishin subjekt i një hetimi pasuror. Pretendimet për abuzim nga mamaja ime nuk qëndrojnë, sepse është hetuar që atëherë nga Inspektorati i Deklarimit të Pasurisë.

Bëhet fjalë për operacionet shëndetësore të mia dhe vajzës sime, por edhe një operacion të Metës. Këto kanë qenë të deklaruara. Ilir Meta, për fatin e tij të mirë, duke qenë burrë shteti, ai nuk është marrë kurrë me gjërat e shtëpisë, s'është pjesë e asnjë lloj shpenzimi apo marrëdhënies tim me kushëririn tim Adrian Shatku. Edhe ajo është histori tjetër, fati i atij qylaxhi ai gjithë jetën, ka për të fituar nga 10 milionë euro tani në SHBA, se do të hapen të gjitha letrat, se është shkelur privatësia dhe gjithë marrëdhënia e mirëbesimit midis spak dhe departamentit të drejtësisë, se dokumentacionet janë marrë pa vendim të SPAK, që është e dënueshme në SHBA. Fati i keq i Metës, është që për hir të politikës ka kaluar shumë pak kohë me fëmijët e tij.

Kemi menduar se duke iu dhënë të tjerëve më shumë, do të kontribuonim më shumë për vendin, por s’ka problem. Iu bëj thirrje gjithë prindërve të rinj që të kujdesen për fëmijët, sepse hallet e politikanëve s’kanë për të përfunduar kurrë. Politikanët e rinj i kanë faturat më të shtrenjta se ne të vjetrit të gjithë bashkë. Ilir Meta është top formë. Në posturë është drejt. I kishin çuar kostumin e gabuar javës së kaluar. I kishin çuar masë të madhe, 56. Duhet t’ja çonin 52-53. Unë jam si të verbërit vëlla, që me dorë e njoh Ilir Metën”, tha mes të tjerash Kryemadhi.

Ish-çifti i bashkëshortëve, Ilir Meta dhe Monika Kryemadhi, do të gjykohen në një proces, të pandehur për korrupsion, pastrim parash dhe fshehje pasurie. Gjykata e Posaçme ndau më vete me gjykim të shkurtuar tre të pandehurit e tjerë.

Në gjyqin në themel në ngarkim të Ilir Metës, prokurori i SPAK i është referuar provave ng dosja hetimore për të vërtetuar lidhjet e ish-presidentit me aferën CEZ-DIA dhe lobimet në SHBA. Aty flitet dhe për shpenzime që ka bërë Monika Kryemadhi me kartën e kushëririt të saj, biznesmeni Ardian Shatku.

“Meta ka pranuar se e njeh Kastriot Ismailajn, ka mesazhe intensive, Meta ne 2009 i ka çuar sms dhe i ka shkruar "dua 200".

Meta e Kryemadhi kane mare përsipër te ushtrojnë presion për çështjen CEZ-DIA qe kompania e Ardian Sharkut të futet ne treg. Ka komunikime te vazhdueshme, takim te Metës ne Marok dhe SHBA. Për fibrat, Shatku ka pasur interes për të ushtruar veprimtarinë për shtrimin e fibrave ne Shqipëri.

Monika dhe Ilir Meta janë angazhuar për futjen në treg të kompanisë së Shatkut. Ata kanë ndikuar te Haxhinasto për të nxjerrë urdhrin nr. 1814, datë 20 mars 2015, për ndryshimin e urdhrit të mëparshëm për shtrirjen e fibrës.

Kryemadhi i k shkruar Shatkut se ne duam kontratën, duke u nënkuptuar se e do edhe Meta. Marrëdhënia e Metës me kompaninë e Shatkut dhe lobimi: LSI ka bërë lobim përmes ndihmës së kompanisë së Shatkut.

LSI ka bërë marrëveshje me disa kompani, duke raportuar se ajo marrëveshje zgjati 1 vit e 4 muaj, por realisht ishte vetëm një muaj, me një kosto prej 15 mijë dollarësh që kaloi nga llogaria. Kryemadhi përdori 234 mijë dollarë nga kartat e Ardian Shatkut”, ka thënë prokurori i SPAK.

Seanca gjyqësore ndaj ish-presidentit Ilir Meta është shoqëruar me momente tensioni dhe komunikime direkte nga salla, ndërsa gjykata ishte tërhequr për të shqyrtuar kërkesat e palëve. Gjatë ndërprerjes së seancës, Bujar Leskaj iu drejtua Metës nga salla.

Bujar Leskaj: President, si je? Je i fortë?

Ilir Meta: Jam mirë, jam i fortë. (Nuk dëgjohet kur përshëndet Nokën dhe mbështetësit në sallë.) Afrohet dhe thotë: Akustika, akustika… xhami.

Këto janë disa foto të shkrepura nga gjyqi i ish-presidentit Ilir Meta, i cili edhe në këtë seancë mbahet brenda kafazit. Siç mund të shihet edhe në foto, Ilir Meta ka vështirësi për të komunikuar me avokatin e tij mbrojtës, Kujtim Cakrani. Ky i fundit në një moment dallohet i afruar pranë kafazit të xhamit dhe mundohet të flasë me Metën përmes një hapësirë të vogël në kafazin e xhamtë.

Në momente të tjera, Meta është fotografuar duke u munduar të flasë vetëm përmes shenjave me gazetarët që ndodhen brenda në sallën e gjyqit, kjo pasi mikrofoni brenda në kafaz është i mbyllur dhe hapet vetëm me miratimin e gjyqtares.

Avokati mbrojtës i Ilir Metës ka kërkuar praninë e mediave dhe transmetimit live të seancës gjyqësore. Kësaj kërkese i është bashkuar dhe Monika Kryemadhi.

Monika Kryemadhi: Jam dakord që seanca të bëhet live. Ky intimidim dhe linçim që më është bërë mua dhe ish burrit tim, duhet të jetë e hapur që shqiptarët të shohin provat. 

Në Amerikë edhe vrasësi ulet jashtë kafazit. Edhe ne dhe prokuroria jemi palë. Duhet të prezumohem e pafajshme. Me duhen përgjimet ambientale dhe telefonike që ka bërë prokuroria. Të plota.

Ish-presidenti Ilir Meta është sot i pranishëm në seancën e dytë të gjykimit në themel të dosjes në ngarkim të tij, ish-bashkëshortes Monika Kryemadhi e të tjerë persona.

Ashtu si në çdo prezencë të tij në sallë të gjyqit, Ilir Meta ndodhet brenda në kafazin e qelqtë. Ai ka përshëndetur mediat duke bërë simbolin e shqiponjës me duar.