GOLAT/ Tirana lë pikë në Ballsh, Bylis ndal kryesuesit e Superligës! Erzeni dhe Kukësi 2 gola në Durrës

Erzeni barazoi 1-1 me Kukësin për javën e 26-të në Superligë. Dueli i zhvilluar në "Niko Dovana" të Durrësit ka qenë me emocione, teksa duhej fundi i ndeshjes që të vulosej rezultati. Ndeshja u hap në minutën e 27-të nga Ilirid Ademi, që shënoi pas asistit të Osmanllarit. Pjesa e dytë ka qenë e luftuar, teksa në minutën e 67, kapiteni i Kukësit, Gjelbrim Taipi gaboi nga penalltia duke goditur shtyllën. Pak minuta më vonë Ademi për Erzenin goditit transversën. Në shtesën e tretë ishte Barbosa te Kukësi që shënoi për 1-1. Sulmuesi brazilian festoi ditëlindjen e 24-t me një gol të bukur edhe pse u fut nga stoli. Erzeni, pas suksesit të një jave më parë rikthehet te barazimi, duke mbajtur vendin e tretë me 37 pikë. Nga ana tjetër, Kukësi pas tre fitoreve ndalet në Durrës dhe me 35 pikë renditet në vendin e gjashtë.

Bylis dhe Tirana barazuan 1-1 për javën e 26-të në Superligë. Pas ndeshjes për Oversport foli edhe trajneri i Tiranës, Orges Shehi. Durrsaku tha se ky duel ishte me dy tablo dhe se zëvendësimet bënë që dueli të barazohej.

"Ishte një ndeshje me dy tablo. Pjesa e parë ishte për t'u harruar dhe ndoshta meritonim të pësonim gol për mënyrën si po luanim. Ndërsa pjesa e dytë foli për ne edhe për disa lëvizje që bëmë. Pësuam një gol, por më pas ushtruam presion. Arritëm të shënonim, kishim edhe një shans tjetër, por i tillë është futbolli. Pjesët nuk korrespodojnë me njëra-tjetrën.

Mungesat? Patrick do të mungojë për pjesën e mbetur të sezonit, por me këtë organikë duhet të arrijmë objektivat. Duhet të luajmë topin që poshtë, duke vënë të gjithë skuadrën në kontakt me topin dhe të rrezikojmë më shumë.

Forma e Hasanit? Florenti është lojtari ynë kryesor. U dëmtua Patrick ndërsa Xhixha u largua. Florenti po bën mirë, por shpresojmë që të rikthehet edhe Abazaj dhe të shënojnë edhe lojtarët e tjerë të skuadrës", tha Orges Shehi.

Në stadiumin "Adush Muça" në Ballsh, Bylisi dhe Tirana barazuan 1-1 për javën e 26-të të Superligës në futboll. Ndeshja ka qenë e luftuar në 90 minuta, me vendasit që sërish nuk ia dolën të sigurojnë pikët e plota për të dalë nga zona e ftohtë. Ka qenë Bylis që në të 66 minutë shënoi me Esquerdinha, teksa duhej fundi i ndeshjes dhe konkretisht minuta e 90-të që Damcevski të shënonte autogol për rezultatin 1-1. Për t'u përmendur edhe anullimi i golit të Lushkjas me VAR në të 49 minutë. Pas këtij dueli, Tirana me 44 pikë kryeson Superligën, duke pritur duelin e nesërm të Partizanit (kundër Kastriotit). Bylis me 28 pikë mban vendin e parafundit në klasifikim (9).