Në pritje të afganëve në Shqipëri, shtyhet fluturimi! Do u bëhet tamponi në konvikte, kush del me COVID do karantinohet! Xhaçka në Rinas, ngrihen çadrat ushtarake! (Itinerari)

TIRANË- Grupi i parë prej 300 afganësh priteshin të mbërrinin sot, por për shkak të situatave kaotike në aeroportin e Kabulit, nisja e tyre është shtyrë dhe është ende e paqartë se kur do të niset avioni dhe për këtë arsye shtyhet edhe ardhja e tyre. Po ashtu bëhet e ditur se nëse avioni do të niset në orët në vijim dhe pas 6-7 orësh fluturim mund të mbërrijë në Tiranë dhe nuk dihet nëse afganët do të mbërrijnë gjatë mbrëmjes apo të nesërmen. Në Rinas janë ngritur disa çadra ushtarake ku ka staf mjekësor, forca ushtarake dhe psikologë për të kontrolluar afganët, për gjendjen e tyre shëndetësore dhe psikologjike.

Zhvillimet kaotike në aeroportin e Kabulit po mbajnë pezull nisjen për në Shqipëri të grupit të qytetarëve afganë. Për dy ditë me radhë fluturimi është shtyrë në kohë të ndryshme. Parashikimi I fundit ishte se avionic do të nisej sot rreth orës 13 nga Kabuli, për të mbërritur në Shqipëri pasdite, por sërish ka qenë e pamundur.

Më pas do të bëhet edhe identifikimi i tyre për t'u regjistruar më pas edhe në sistemin TIMS.Tirana dhe Durrësi do të jenë dy qytetet ku do të strehohet grupi i parë me 300 afganë, të cilët vijnë 3 ditë pasi kryeministri Edi Rama pranoi kërkesën e SHBA. Burime për Report Tv mësojnë se afganët do të transportohen me autobusë nën shoqërinë e Forcave të Rendit dhe të Ushtrisë. Në Durrës do të strehohen në disa hotele, ndërsa në Tiranë do të vendosen tek konviktet e Qytetit Studentit. Pasi të akomodohen, do t'u bëhet tamponi. Në momentin që do të ketë persona që do të rezultojnë pozitiv me COVID, ata do të karantinohen. Në Rinas ishte e pranishme edhe Ministrja e Mbrojtjes, Olta Xhaçka. Xhaçka pas vizitës atje, kreu inspektim në Qytetin Studenti ku pritet që të akomodohen refugjatët afganë. 

Xhaçka në cilësinë edhe të koordinatores për operacionin humanitar në ndihmë të shtetasve afganë, tha se çadrat e ngritura si ndalesa e parë e afganëve në Shqipëri për të marrë ndihmën e parë mjekësore ka një kapacitet prej 400 personash.

Pak ditë më parë studentëve në Tiranë u është kërkuar të lënë konviktet e Qytetit Studenti, për t'u zhvendosur nga godina nr.2 dhe nr.4, të cilat janë përcaktuar fillimisht për vendosjen e afganëve, në godina të tjera, për të paktën tre javë.

Kryebashkiaku Erion Veliaj bëri me dije se në tetor, të gjitha godinat në Qytet Studenti do të jenë në dispozicion të studentëve. Sipas tij, afganët do të transportohen më pas në hotelet në bregdet, që në atë periudhë janë liruar edhe nga fluksi i turistëve.

Të paktën 2 mijë afganë do të strehohen përkohësisht mes Shqipërisë, Kosovës dhe Maqedonisë së Veriut (RMV). Shqipëria po përgatitet për të pasur në gadishmëri kapacitete për 1500 emigrantë. Report Tv ka mësuar gjithashtu se jo çdo person do të lejohet të strehohet në Shqipëri, por sipas marrëveshjes është specifikuar që do të pranohen vetëm ata që kanë qenë bashkëpunëtorë të aleancës NATO-SHBA, ose gra aktiviste dhe intelektualë siç ka specifikuar dje kryeministri Edi Rama.  

Qytetarët afganë që do të strehohen në vendin tonë kanë punuar gjatë këtyre viteve me SHBA-në dhe NATO, si dhe aktivistë dhe mendohet se do të jenë shënjestra e hakmarrjes talebane, pasi këta të fundit morën pushtetin, prandaj largimi i tyre është parë si emergjente. Menjëherë pas konfirmimit zyrtar që Shqipëria do të hap dyert për t'i pritur, pas nisjes së "luftës", një numër i madh i qytetarëve afganë janë paraqitur në ambasadën shqiptare në Turqi në kërkim të evakuimit drejt vendit tonë, ndonëse ashtu si kurse është bërë e ditur edhe më herët, janë një kategori personash që do të lejohen.

Shqipëria pak ditë më parë mori vendimin se do të strehojë disa qindra afganë që kanë punuar me strukturat amerikane dhe ato të institucioneve të tjera ndërkombëtare në vendin e tyre, pas kërkesës së bërë nga Shtetet e Bashkuara. Kreu i qeverisë, Edi Rama tha se vendi ynë do të shërbejë si tranzit për një numër të caktuar emigrantësh politikë afganë, të cilët destinacion final kanë Shtetet e Bashkuara. Pas Shqipërisë, edhe Kosova ka dhënë dritën jeshile për të pritur afganët, e ndërsa një vendim i tillë është pritur pozitivisht nga ndërkombëtarët, të cilët kanë vlerësuar vendin tonë si një vend i denjë aleat i NATO-s dhe SHBA-së. 

 

Rendit zhvillimet sipas orarit:

Të Fundit Të Parat

/LR/Shqiptarja.com

TAG:
• Tirane
• Durres
• olta xhaçka
• Afganistan
• strehimi i afganeve ne shqiperi
• TIMS