Heqja e germave të TK/ PD: Provë se Rama s'ka hequr dorë nga shembja; LSI: Vepër e hajnve të qeverisë

Teatri Kombëtar është "zgjuar" sot pa gërma. Autorët e këtij episodi nuk janë zbardhur ende, e ndërsa një ngjarje e tillë ka sjellë reagime nga Partia Demokratike dhe Lëvizja Socialiste për Integrim.

Nga selia blu është ish-deputetja e PD, Albana Voksi e cila ka bërë fajtor kryeministrin Edi Rama. Sipas saj, kjo vepër është një tregues që kreu i qeverisë nuk ka hequr dorë nga shembja e Teatrit Kombëtar.

"Rama urdhëron çmontimin pa zhurmë, fshehurazi, të #Teatrit #Kombëtar ndërkohë që rilind Piramidën e Diktatorit! Në orët e vona të natës, si skuth, Rama urdhëroi heqjen  vjedhurazi, të germave të Teatrit Kombëtar, për të na kujtuar që nuk ka hequr dorë nga shembja djallëzore e ndërtesës historike.Rama po vjedh pronën publike, trashëgiminë kulturore, historinë e qytetit për të pastruar me kulla betoni qindra miliona euro nga korrupsioni. Le ta provojë! Teatrin Kombëtar do ta mbrojmë me çdo mjet e me çdo kosto! Mirënjohje Aleancës për Mbrojtjen e Teatrit dhe çdo qytetari që po proteston prej 400 ditësh në mbrojtje të Shtëpisë së Artistëve e të vlerave kombëtare. As gazi, as policia, as arrestimet, nuk do na ndalin të ruajmë të paprekur trashëgiminë kulturore të shqiptarëve", tha Vokshi.

Nga LSI, është Petrit Vasili, i cili është në të njëjtën linjë me ish-deputetën e PD, duke bërë autor të kësaj ngjarje, qeverinë.

"Batakçinjtë e qeverisë vjedhin germat e Teatrit.Batakçinjtë e qeverisë vjedhin natën, si hajna të vërtetë, germat e ndërtesës së Teatrit Kombëtar. Kaq të pështirë, kaq të vegjël, kaq meskine dhe kaq hajdute. Liliputet e qeverisë janë kaq të vegjël përpara germave të historisë gigande të Teatrit Kombëtar. Shiheni foton, mos e hiqni nga memorja dhe përbuzini hajnat e natës", shkruan Vasili.

B.K./G.M./Shqiptarja.com

TAG:
• LSI
• teatri kombetar
• PD
• heqja e germave